«Жамбыл облысы әкімдігінің білім басқармасының мамандандырылған әскери мектеп-интернаты» коммуналдық мемлекеттік мекемесі Жамбыл облысы әкімінің 2025 жылғы 5 тамыздағы №162 Қаулысымен құрылып, Жарғысы бекітілді. Заңды тұлға мемлекеттік тіркеуден өтті. Білім беру қызметімен айналысуға арналған лицензия берілді.
Мекеме Тараз қаласы Қ.Сәтбаев көшесі, 27 мекен-жайында орналасқан. Мектептің оқу ғимараты 320 орынға арналған. Оқыту мемлекеттік тілде жүргізіледі. Оқыту бағыты — жаратылыстану-математикалық бағыт.
Мектептің мақсаты — оқушының бойына ұлттық рух пен патриоттық сана дарыта отырып, интеллектуалды әлеуеті жоғары, физикалық тұрғыдан дайын, жауапкершілік пен тәртіпті жете түсінетін, ел болашағына үлес қосуға дайын жас азаматты қалыптастыру. Заманауи білім беру мен әскери-патриоттық тәрбиені ұштастыра отырып, оқушыны тек білім иесі ғана емес, Отан қорғаушы, көшбасшы тұлға ретінде тәрбиелеуді мақсат еткен үлгілі әскери мектепке айналу.
Әскери мектеп-интернатқа оқушыларды қабылдау «Бастауыш, негізгі орта және жалпы орта білімнің жалпы білім беретін оқу бағдарламаларын іске асыратын білім беру ұйымдарына оқуға қабылдаудың үлгілік қағидаларын бекіту туралы» Қазақстан Республикасы Білім және ғылым министрінің 2018 жылғы 12 қазандағы № 564 бұйрығына сәйкес конкурстық негізде жүргізіледі.
Мамандандырылған мектеп-интернатқа оқуға түсу кезінде Қазақстан Республикасының 12 жасқа толған, жалпы білім беру мекемесінің 6-сыныбын ойдағыдай бітірген, денсаулық жағдайы бойынша жарамды, кәсіби-психологиялық іріктеу және дене шынықтыру даярлығы талаптарына сай келетін ер азаматтар қабылданады.
Мектеп интернат түрінде жұмыс істейді. Мектеп-интернатта оқу мерзімі — жалпы білім беретін мектеп бағдарламасы бойынша 5 жыл (7-11-сыныптар). Әскери мектеп білім алушыларын оқыту және олардың интернатта тұруы: орналасуы, тамақтануы қамтамасыз етілуі тегін түрде жүзеге асырылады.
Мектеп-интернатқа кандидаттарды іріктеу бірнеше кезеңнен тұрады.
1. Қазақ тілі, Қазақстан тарихы, матемтатика, ағылшын тілі пәндерінен кешенді тестілеу
2. Кәсіби-психологиялық іріктеу
3. Дене шынықтыру даярлығы бойынша нормативтер
4. Медициналық куәландыру 2025-2026 оқу жылына оқушыларды қабылдау 2025 жылдың 29 қыркүйек – 25 қазан күндері жүргізіліп, 620 өтініш келіп түсті, оның ішінде 7,8,9 сыныптарға 180 тәрбиеленуші конкурстан өтті.
Мамандандырылған әскери мектеп-интернатының ерекшеліктері:
— Жаратылыстану-математикалық бағытындағы пәндер, информатика, ағылшын тілі тереңдетіліп оқытылады.
— Ағылшын тілі үш топқа, алгебра, геометрия, физика,география,информатика пәндері екі топқа бөлініп оқытылады.
— Әскери, спорттық, музыкалық бағыттағы үйірмелер жүргізіледі.
— Оқушылар жатақханамен қамтамасыз етіледі.
— Күніне 5 рет тамақтандыру қарастырылады.
— Әскери мектеп формаларымен қамтамасыз етіледі.
Мамандандырылған әскери мектеп-интернатының түлектері келесі жоғарғы оқу орындарында өз білімдерін жалғастыра алады:
* ҚР Қорғаныс министрлігінің жоғарғы оқу орындары;
* ҚР Ұлттық қауіпсіздік комитетінің жоғарғы оқу орындары;
* ҚР Ішкі істер министрлігінің жоғарғы оқу орындары;
* ҚР Төтенше жағдайлар министрлігінің жоғарғы оқу орындары;
* ҚР Ғылым және жоғары білім министрлігінің жоғарғы оқу орындары;
* Шет елдік жоғарғы және арнайы кәсіптік оқу орындары.
