31 желтоқсан, сәрсенбі күні Жамбыл облысының әкімі Ербол Қарашөкеев азаматтық қоғам өкілдерімен кездесіп, оларды Жаңа жыл мерекесімен құттықтады.
Аймақ басшысы ұзақ жылдар бойы мемлекеттік басқару жүйесінде қызмет етіп, облыстың әлеуметтік-экономикалық дамуына сүбелі үлес қосқан ардагерлерге құрмет көрсетудің маңызын атап өтті.
– Өңірдің дамуына адал қызмет етіп, бүгінгі күні бейнеттің зейнетін көріп отырған сіздерге қызмет көрсету – біздің азаматтық парызымыз. Қадірлі зейнетте болсаңыздар да, жас ұрпақты тәрбиелеу арқылы қоғам өміріне белсене араласып келесіздер. Сіздердің өмірлік тәжірибелеріңіз бен салмақты ақыл-кеңестеріңіз – бүгінгі және келер ұрпақ үшін баға жетпес қазына. Жамбыл облысында ардагерлерге әлеуметтік қолдау көрсету, олардың белсенді өмір сүруіне жағдай жасау әрдайым назарымызда, – деді Ербол Қарашөкеев бастауыш ардагерлер ұйымының мүшелерімен жүздесу барысында.
Жылы шырайда өткен кездесуде бастауыш ардагерлер ұйымының төрағасы Рахматілда Рахманбердиев, ұйым мүшелері Нілзия Рахишева мен Оңласын Есіркепов сөз сөйлеп, өңірде атқарылып жатқан жұмыстар мен жүзеге асырылған бастамаларға оң бағаларын берді.
Сондай-ақ осы күні облыс әкімі қоғамдық кеңестің жыл бойы атқарған жұмыстары қорытындыланған жиынға қатысты. Басқосуда кеңестің өңір дамуындағы рөлі мен азаматтық бақылауды күшейту бағытындағы қызметі сараланды.
Кездесу соңында Ербол Қарашөкеев қоғамдық кеңес мүшелерін Жаңа жыл мерекесімен құттықтап, алдағы жұмыстарына табыс пен толағай жетістіктер тіледі.
