Жамбыл ауданындағы бірқатар әлеуметтік және инвестициялық нысандардың жұмысымен таныстым.
Аса ауылының кіреберісінде жаңадан пайдалануға берілген аудандық орталық кітапхана, мұрағат және жасөспірімдерге арналған демалыс кешені аудан орталығының көркін арттырып тұр. Аудан әкімі Ерлан Қыдыралыұлы өңірдің әлеуметтік-экономикалық дамуы бағытындағы алдағы жоспарларымен бөлісті.
Аталған нысандар бюджет қаражаты есебінен салынған және тұрғындарды тұрақты жұмыспен қамтуға мүмкіндік беріп отыр.
Одан кейін Аса ауылында салынып жатқан 120 пәтерлі көпқабатты тұрғын үйдің құрылыс барысын көрдік. Бұл жоба әлеуметтік осал топтағы азаматтар мен тұрғын үй кезегінде тұрған отбасыларды баспанамен қамтуға бағытталған. Құрылыс толық аяқталғаннан кейін 120 отбасы жаңа әрі заманауи пәтерге қол жеткізеді.
Сапар барысында «AzNurAgro» өндірістік кооперативінің 400 басқа арналған тауарлы сүт фермасының құрылыс алаңында болдық. Ферма заманауи технологиялармен жабдықталып, ауыл тұрғындары үшін жаңа тұрақты жұмыс орындарын ашуға бағытталған. Жобаның іске асырылуы ауданның ауыл шаруашылығы әлеуетін арттыруға оң ықпал етеді. Шет өңірлерден әкелінген ірі қара жергілікті климатқа бейімделіп келеді.
Сондай-ақ Айшабибі ауылындағы «Ализа» ЖШС-нің көкөніс сақтау қоймасының, одан кейін «Superpharm» ЖШС-нің бір реттік медициналық бұйымдар өндіретін кәсіпорнының жұмысымен таныстым.
Кәсіпорын медициналық қолғаптар мен шығын материалдарын шығарып, ішкі нарықты отандық өніммен қамтамасыз етуде. Жоба аясында жаңа жұмыс орындары ашылып, өндіріс көлемін кезең-кезеңімен ұлғайту жоспарланған.
Кәсіпорын басшылығы тарапынан айтылған ұсыныс-пікірлер назарға алынды.
Жалпы, соңғы жылдары Жамбыл ауданында ауқымды жұмыстар атқарылуда. Аудан толықтай газ және ауыз сумен қамтылып, өңірдің әлеуметтік-экономикалық әлеуеті жылдан жылға артып келеді.
