Меркі ауданының мемлекеттік қайтарымсыз грант иегерлерінің бірі — Юсупова Ақтеңге бүгінде жеке тігін кәсібін табысты түрде дамытып отыр. Кәсіп иесінің айтуынша, бұл салада еңбек етіп келе жатқанына 5 жыл болса, ал тігін мамандығын меңгергеніне 20 жылға жуықтаған.
Шебер тігінші қазіргі таңда мектептер мен балабақшалардан, сондай-ақ ауыл тұрғындарынан тұрақты түрде тапсырыс қабылдайды. Шеберханада ұлттық киімдер, Наурыз мерекесіне арналған сахналық үлгілер, жаңа жылдық және аниматорлық костюмдер, сондай-ақ тұрмыстық мақсаттағы түрлі тігін бұйымдары тігіледі. Бүгінде кәсіпкер бір адамды тұрақты жұмыспен қамтып отыр. Алдағы уақытта тігін цехын кеңейтіп, жұмыс аясын ұлғайту жоспарда бар.
Шеберханада еңбек етіп жүрген Құрбаниязова Роза бұл ұжымда екі жылдан бері жұмыс істеп келеді. Оның айтуынша, жұмыс берушімен апалы-сіңілідей тату болып, әрбір тапсырысты сапалы әрі уақытында орындауға бар күш-жігерін салады. Сонымен қатар ай сайынғы еңбекақысын уақытылы алып отырғанын да атап өтті.
Ал тігін шеберханасының тұрақты тапсырыс берушісі, Меркі ауданының тұрғыны, төрт баланың анасы Байдалиева Асель шеберхана жұмысына ризашылығын білдірді. Оның айтуынша, шеберхана ашылғалы бері балаларға қажетті мектеп және балабақша киімдерін осы жерден тіктіріп келеді. Тігін өнімдерінің сапасы жоғары, жұмысы жылдам әрі үйіне жақын орналасуы да қолайлылық тудырады. Бұдан бөлек, жеке шағын дәмханасына қажетті жастықтар мен өзге де тұрмыстық бұйымдарды осы шеберханада тіктіріп алатынын жеткізді.
Осындай кәсіпкерлік бастамалар аудан экономикасының дамуына серпін беріп, тұрғындарды жұмыспен қамтуға және сапалы қызмет көрсетуге өз үлесін қосуда.
