Жамбыл облысы бойынша Қылмыстық-атқару жүйесі департаментіне қарасты №59 мекемесінің қызметкерлері Жамбыл политехникалық жоғары колледжінің студенттерімен кездесу өткізді. Шараға мекеме бастығының орынбасары, әділет подполковнигі Айбек Ниязымбетов және сотталғандар арасында тәрбие жұмыстары жөніндегі бөлім бастығы, әділет майоры Мұқағали Құрманқұл қатысты.
Кездесудің негізгі мақсаты – қоғамда орын алып жатқан қылмыстардың алдын алу, жастар арасында құқықтық сауаттылықты арттыру және заң талаптарын сақтаудың маңыздылығын түсіндіру болды.
Іс-шара барысында №59 мекеме қызметкерлері студенттерге қылмысқа итермелейтін себептер, оның салдары және заң алдындағы жауапкершілік туралы кеңінен баяндады. Әділет подполковнигі Айбек Ниязымбетов жастарды заңға қайшы әрекеттерден аулақ болуға, саналы өмірлік ұстаным қалыптастыруға шақырды.
Сонымен қатар, студенттер мекемеде жазасын өтеп жатқан сотталған азаматтармен бейнебайланыс арқылы жүздесті. Сотталғандар өз өмір жолындағы қателіктерін мойындап, жасаған қылмыстары үшін өкінетіндерін жеткізді. Олар жастарға өз бастарынан өткен жағдайды сабақ етіп, дұрыс жол таңдауға кеңес берді.
Бұл бейнежүздесу студенттерге ерекше әсер қалдырып, қылмыстың адам тағдырына, отбасы мен қоғамға тигізетін ауыр зардабын нақты мысалдар арқылы көрсетті.
Кездесу соңында ұйымдастырушылар мұндай профилактикалық бағыттағы іс-шаралар жастар арасында құқық бұзушылықтың алдын алуға ықпал ететінін айтып, алдағы уақытта да жалғасын табатынын атап өтті.
