Бүгінде қала аумағында Конституциялық заң жобасын түсіндіру жұмыстары жалғасуда. Жібек жолы ауданында құрылған жұмысшы топ ауданның зиялы қауымымен және ардагерлермен кездесу өткізді.
✅Кездесу барысында қатысушыларға ҚР Конституциясының жаңа жобасы туралы жан-жақты ақпарат ұсынылды. Елдің жаңа Негізгі заңының жобасы қоғамда кең ауқымды талқылау мен сараптамалық қараудан өткен маңызды құжат екені айтылып, оның мәтінінде көптеген бөлімдер мен баптар қайта қаралып, азаматтардың құқықтары мен бостандықтарын қорғау кепілдіктерін күшейтуге, сондай-ақ мемлекеттік институттардың тиімділігін арттыруға бағытталған бірқатар өзгерістер қарастырылғаны атап өтілді.
🔹Сонымен қатар, Жамбыл инновациялық жоғары колледжінде оқытушылар мен студенттерге жаңа Конституция жобасында енгізілген негізгі өзгерістер туралы ақпарат беру және конституциялық реформалардың мақсаттары мен мазмұнын бірыңғай түсінуді қамтамасыз ету мақсатында дөңгелек үстел өтті. Дөңгелек үстел білім беру қатысушыларының құқықтық хабардарлығын арттырып, студенттердің құқықтық санасы мен азаматтық жауапкершілігін арттырды.
🔹Әулиеата ауданының әкімі Барлық Төреханов Тараз қаласы бойынша мемлекеттік кірістер басқармасының ұжымымен кездесіп, жаңа Конституция жобасындағы жаңашылдықтар мен ерекшеліктеріне тоқталды. Жиынға сонымен қатар Қазақ ұлттық Су шаруашылығы және ирригация университетінің қауымдастырылған профессоры, Тараз қалалық мәслихаттың депутаты Кенжеғали Шилібек қатысып Ата Заңның жаңа жобасын түсіндірді.
🔹«БАЙТАҚ» жасылдар партиясы қалада түсіндіру жұмыстарын қарқынды атқарып келеді. Тараз Мамандандырылған колледжінде партияның «Жас Байтақ» жастар қанатының ұйымдастыруымен студенттермен мазмұнды кездесу өтті. Жиында конституциялық реформаның маңызы түсіндіріліп, экологиялық қауіпсіздік, жаһандық жылыну, қоршаған ортаны қорғау мәселелері қозғалды.
🔹Конституцияның жаңа жобасын түсіндіру жұмыстары аясында қалалық спикерлер М.Жұманқұлов пен С.Жетибаев қалалық көпбейінді ауруханасы және консультативтік-диагностикалық орталық қызметкерлерімен кездесті. Кездесуде медицина саласының қызметкерлеріне жаңа реформаның өзектілігі мен тиімді тұстары жан-жақты түсіндірілді. Спикерлер конституциялық реформа әр азаматтың құқығы мен болашағына тікелей әсер ететін маңызды тарихи оқиға екенін жеткізді.
🔹№3 облыстық мамандандырылған балалар мен жасөспірімдер спорт мектебінде Мәжіліс депутаттары Е.Далабай мен Н.Саурықовтың қатысуымен Конституциялық реформалар жөнінде мазмұнды кездесу өтті. Кездесу барысында Қазақстан Республикасының жаңа Ата Заңының жобасы кеңінен түсіндіріліп, оның негізгі бағыттары мен маңыздылығы жайында жұртшылықтың ойлары ортаға салынды.
