16 наурыз – Мәдениет және ұлттық салт-дәстүр күні

Жамбыл облысы бойынша Қылмыстық-атқару жүйесі департаментіне қарасты №67 мекемесінде 16 наурыз – Мәдениет және ұлттық салт-дәстүр күніне орай сотталған азаматтар арасында танымдық және мәдени іс-шаралар ұйымдастырылды.
Іс-шараның негізгі мақсаты – ұлттық құндылықтарды дәріптеу, қазақ халқының бай мәдени мұрасы мен салт-дәстүрлерін кеңінен насихаттау, сондай-ақ сотталған азаматтардың рухани дүниесін байытып, олардың мәдени танымын арттыру болды.
Шара барысында қатысушыларға Қазақстанның тарихы мен мәдениеті туралы мазмұнды дәрістер мен тақырыптық сағаттар өткізілді. Кездесу барысында қазақ халқының ғасырлар бойы қалыптасқан салт-дәстүрлері, әдет-ғұрыптары мен ұлттық құндылықтарының қоғамдағы орны мен маңызы кеңінен түсіндірілді.
Сонымен қатар ұлттық мәдениет пен тарихқа арналған деректі және көркем фильмдер көрсетіліп, қатысушылардың тарихи танымын кеңейтуге бағытталған мазмұнды пікір алмасу ұйымдастырылды.
Іс-шара аясында сотталған азаматтардың қолынан шыққан сәндік-қолданбалы шығармашылық бұйымдарының көрмесі де ұйымдастырылды. Көрмеде ұлттық нақыштағы түрлі қолөнер туындылары қойылып, қатысушылардың шығармашылық қабілеттері мен өнерге деген қызығушылықтары көрініс тапты.
Мұндай мәдени-танымдық іс-шаралар сотталған азаматтардың бос уақытын тиімді ұйымдастыруға, олардың рухани-адамгершілік құндылықтарын нығайтуға және ұлттық мәдениетке деген құрметін арттыруға ықпал етеді.
Жамбыл облысы бойынша ҚАЖ департаментіне қарасты №67 мекемесінде тәрбиелік және мәдени бағыттағы іс-шаралар алдағы уақытта да тұрақты түрде ұйымдастырылатын болады.