Жамбыл облысының әкімі Ербол Қарашөкеев «Мобайл Телеком-Сервис» ЖШС-ның басқарма төрағасы Александр Бабичевпен кездесу өткізді.
Кездесу барысында телекоммуникациялық инфрақұрылымды дамыту мәселелері талқыланды.
Өңір басшысы Жамбыл облысында цифрлық саланы дамыту бойынша жүйелі жұмыс жүргізіліп жатқанынна назар аударды. 2025 жылдың қорытындысы бойынша байланыс саласындағы нақты көлем индексі 110,1 пайызды құрады, бұл республикалық көрсеткіштен (103,6%) жоғары. Салаға салынған инвестициялар көлемі 12,7 млрд теңге.
Аймақта цифрлық инфрақұрылымды кеңейту аясында жүйелі шаралар жүзеге асырылуда. Ауылдық елді мекендерді оптикалық-талшықты байланыспен қамтамасыз ету, сондай-ақ 4G стандарты бойынша мобильді интернеттің қамтылуын кеңейту жұмыстары жүргізілуде.
Ербол Қарашөкеев қазіргі уақытта өңірде Tele2/Altel компанияларына тиесілі 355 базалық станция жұмыс істейтінін атап өтті. Бұл 4G технологиясына халықтың 91 пайызының қол жеткізуін қамтамасыз етеді. Тараз қаласында 176 базалық станция орнатылған, оның 61-і 5G технологиясын қолдайды.
Сонымен қатар кейбір елді мекендерде 3G технологиясынан 4G технологиясына өту жүзеге асырылып жатыр, бұл тұрғындар үшін байланыс сапасын едәуір жақсартуға мүмкіндік береді.
Тараптар 5G желісін дамыту, өнеркәсіптік интернет, қашықтан мониторинг және автоматтандырылған басқару жүйелері сияқты заманауи цифрлық шешімдерді енгізу мүмкіндіктерін талқылады.
Облыс әкімі бірлескен жобаларды жүзеге асыруға, соның ішінде жер учаскелерін бөлу және инженерлік инфрақұрылымға қосу мәселелерінде қолдау көрсетуге дайын екендігін жеткізді.
Кездесу қорытындысы бойынша тараптар ынтымақтастықты одан әрі нығайтуға мүдделі екенін растады.
Іс-шара барысында Жамбыл облысында байланыс пен интернетті дамыту бойынша өзара іс-қимыл туралы Меморандумға қол қойылды. Бұл құжат желі қамтылуын кеңейтуге және заманауи телекоммуникациялық технологияларды енгізуге бағытталған.
