АҚШ-тың Вашингтон қаласында Дүниежүзілік банктің штаб-пәтерінде Қарағанды-Жезқазған автожолының құрылысын қаржыландыру келісіміне қол қойылды, деп хабарлайды Politico.kz.
Бұл құжат ҚазАвтоЖол ұлттық компаниясы, Халықаралық қайта құру және даму банкі мен Азия инфрақұрылымдық инвестициялар банкі арасында бекітілді.
Жоба аясында ұзындығы 457 шақырым болатын жаңа жол салынады. Оған 650 млрд теңге көлемінде қарыз қарастырылған.
Құрылыс жұмыстары осы жылы басталады, қазір конкурстық рәсімдер аяқталуға жақын.
Жаңа магистраль аймақтың транзиттік әлеуетін арттырып, көлік қозғалысын қауіпсіз етеді және жол жүру уақытын айтарлықтай қысқартады. Сонымен қатар логистиканы жақсартып, Орталық Қазақстанның дамуына үлкен серпін береді және жаңа жұмыс орындарын ашады.
«Бүгін Вашингтонда Дүниежүзілік банктің штаб-пәтерінде ҚазАвтоЖолмен Қарағанды-Жезқазған жолын салу және жаңғырту бойынша қарыз келісіміне қол қойдық. Бұл жоба көп жылдан бері Дүниежүзілік банк қаржыландыратын жобалар легінің жалғасы. Мысалы өткен 14 жылда жалпы сомасы 3 млрд доллардан асатын жобалар қаржыландырылды. Олар өте сәтті болды, өйткені жоспарланғаннан әлдеқайда көп жол салынып, жөнделді. Осы табысты ынтымақтастыққа сүйеніп, енді Қарағанды-Жезқазған жолын жаңғыртуға кірісеміз. Сондай-ақ біздің жоспарымызда Бейнеу-Сексеуіл сияқты жол салу бойынша кеңейтілген бағдарламаны қаржыландыру бар», — деді Дүниежүзілік банктің Қазақстан мен Түрікменстандағы өкілдігінің басшысы Андрей Михнев.
Осы орайда ҚазАвтоЖол басшысы басталғалы жатқан ірі жобалардың жоспарымен толығырақ бөлісті.
«Қазіргі таңда біз АҚШ-тағы Вашингтон қаласында, халықаралық қаржы институтының бірі — Дүниежүзілік банктің офисіндеміз. Бұл кездесу кезінде бүгін Қызылорда-Қарағанды-Жезқазған жобасы бойынша келісімшартқа қол қойылды. Бұл жоба бәріне мәлім, көптен күткен жоба. Биыл күз маусымында 500 шақырымнан астам жолдың құрылыс жұмысы басталады. Сонымен қатар қазіргі таңда Дүниежүзілік банкпен тағы бір маңызды келісімшарт жұмысы жүргізіліп жатыр. Ол — Бейнеу-Сексеуіл жобасы. Бұл теміржол желісі Президент тапсырмасына сәйкес осы жылы салынуы тиіс. Биыл құрылыс жұмысы басталады. Оның бірінші мақсаты — Қытай мен Батыстың тауар тасымалдау жолын қысқарту. Жалпы ұзындығы 600 шақырымдай. Яғни жаңа жоба жүзеге асырылған кезде жол қазіргі уақытпен салыстырғанда 900 шақырымға қысқарады. Осы жол арқылы Орталық Азиядан Батысқа және Қытайдан Батысқа тауар жеткізіледі. Бұл жоба жүзеге асырылғаннан кейін жүк тасымалы көлемі кем дегенде 40 пайызға ұлғаяды деп отырмыз», — мәлімдеді ҚазАвтоЖол басқарма төрағасы Дархан Иманашев.
Қарағанды-Жезқазған жолына 650 млрд теңге бөлінді. Фото: Үкімет
Politico.kz.
