«Әппақ сүтін аузыма сап, адал бол деп баққан анам» — өмірдегі ең жақсы, ең қасиетті тәрбиенің негізі. Анаңыздың сізге айтқан осы бір сөзі – ар-ұятты биік ұстауға, тура жолдан таймауға үйрететін басты өсиет.
Қайсы бір этностың өзіне тән, сан ғасырлардан бері үзілмей келе жатқан құндылығы болады. Осы құндылық қауымды ыдыратпай тұтастандырып тұрады. Яғни ол құндылық – сыртқы әсерлердің кері әрекетінен сақтайды.
Бүгінгі қоғамның бет-бейнесі – әр азаматтың іс-әрекеті мен таңдауының нәтижесі. Әсіресе адалдық пен әділдік мәселесі елдің дамуы мен тұрақтылығында шешуші рөл атқарады. Егер біз заңды құрметтеп, таза еңбекті бағалайтын болсақ, онда болашағымыз да берік әрі сенімді болмақ.
Жемқорлық – бұл тек заң бұзушылық емес, ол қоғамның іргесін шайқалтатын қауіпті құбылыс. Пара арқылы мәселені «жылдам шешу» кейбіреулерге тиімді көрінуі мүмкін. Алайда мұндай әрекеттер ұзақ мерзімде сенімсіздікке, әділетсіздікке және мүмкіндіктер теңсіздігіне алып келеді. Соның салдарынан адал еңбек еткен азаматтар тасада қалып, қоғамда әділдікке деген сенім әлсірейді.
Адалдық – әр адамның жеке таңдауы. Ол үлкен істерден емес, күнделікті қарапайым әрекеттерден басталады. Өз міндетін жауапкершілікпен атқару, заңды бұзбау, әділетсіздікке бейжай қарамау – осының бәрі жемқорлықсыз қоғам қалыптастырудың негізі.
Жастарға дұрыс бағыт көрсету де аса маңызды. Себебі ертеңгі ел тағдыры – олардың қолында. Егер біз бүгін адалдықты насихаттап, әділдік қағидаларын берік ұстансақ, онда келешек ұрпақ та осы жолды жалғастырады.
Жемқорлықпен күрес – бір реттік науқан емес, бұл үздіксіз жүретін процесс. Ол үшін мемлекет пен қоғам бірлесе әрекет етуі қажет. Әрбір азамат өз үлесін қосқанда ғана нақты нәтиже болады.
Біз адал еңбекті, таза ниетті және әділ қоғамды таңдаймыз. Себебі болашақ – бүгінгі ісіміздің айнасы. Жемқорлыққа қарсы тұру – өзімізге, елімізге және келешек ұрпаққа деген жауапкершілік.
Халқымызда «Ақылың болса, арды сақта» деген нақыл бар. Адалдық пен ар-ұят – адамгершіліктің өзегі, ал жас ұрпақтың адалдығы – ұлттың келешектегі кемелдігінің кепілі. Мемлекет басшысы Қасым-Жомарт Тоқаев ел болашағына әсер ететін ең басты фактор ретінде жастардың жаңа құндылықтар рухында тәрбиеленуін ерекше атап келеді.
Мемлекет басшысының бұл сөздері халқымыздың жадында бұрыннан орныққан ақиқатты жаңғыртады. Адалдық пен әділдік егіз құндылық екенін түсінген ел ғана ілгерілейді. Ұлт ұстазы Абай Құнанбайұлының «Адал еңбекпен мал іздемек – арлы адамның ісі» деген өсиеті бүгін де өміршең. Президент Қасым-Жомарт Тоқаев ұрпақ тәрбиесінде дәл осы қағидаларды негізге алып, жастарды отансүйгіштікке, еңбекқорлыққа, әділеттілікке шақырып отыр.
Жас буынды имандылыққа, әділдікке баулуда отбасы тәрбиесімен қатар, мектеп пен жоғары оқу орындарындағы тәрбие жұмысының маңызы зор. Білім ордаларында оқушыларға тек білім ғана емес, адалдық және жауапкершілік тәрізді қасиеттерді де үйрету жолға қойылған.
«Сыбайлас жемқорлыққа қарсы мәдениет: адал қоғам – әділ болашақ» Жамбыл облысы бойынша бұқаралық ақпарат құралдары арасындағы конкурс– соның айғағы.
Мұндай тәрбиелік мәні зор шаралар еліміздің түкпір-түкпірінде тұрақты жалғасын тауып келеді. Әсіресе «Әділдік жолы» республикалық қоғамдық бірлестігінің ұйымдастыруымен өткізіліп келе жатқан шаралар жас жеткіншектерді ізгілікке жетелеуде.
Жамбыл облысы әкімдігінің ақпарат және қоғамдық даму басқармасы, ҚР мемлекеттік қызмет істері агенттігінің Жамбыл облысы бойынша департаменті, «Адал қоғам» ҚБ-нің ұйымдастыруымен өткізіліп келе жатқан конкурс тек БАҚ та ғана емес, қала және аудан көлемінде қолдау тауып, тіпті мыңдаған жасөспірімдер мен студенттер адалдық жолындағы қозғалысқа тартылып, мемлекет ішіндегі үлкен іске өз үлестерін қосуда.
Мәселен аудандар бойынша барлық білім ошақтарында оқу жылы барысында өткен дөңгелек үстелде «Әділдік жолы» республикалық қоғамдық бірлестігінің Жамбыл облыстық филиалының жетекшісі Назима Дәрменқызы баяндама жасап, сыбайлас жемқорлыққа қарсы іс-қимылдың маңыздылығына тоқталды.
Ал, оқушылардың «Заң бәріне ортақ» атты сахналық қойылым қойып, көрермендерді заңға құрметпен қарауға, жемқорлықтан алыс болуға үндеуі – тәрбиенің жаңа форматының бір үлгісі.
Сол сияқты, жоғары оқу орындары мен колледж студенттері арасында парасаттылық тақырыптарында дебаттар, эссе байқаулары, стенд-ап форматындағы пікірталастар ұйымдастырылып, жеңімпаз жастар марапатталуда. Осындай шығармашылық әдістер арқылы адалдық идеологиясы жас ұрпақтың санасына жақындай түсетіні сөзсіз.
Жамбыл жастарының бүгінгі келбеті күннен-күнге өзгеріп, жаңа қырынан танылуда. Олардың арасында ғылым-білім, өнер, спорт салаларында әлемге танылып, еңбегімен аты шыққан дарынды буын қалыптасып келеді. Ең бастысы – бұл жас толқынның ар-ұяты бар, әділетке жаны жақын, жаңалыққа құштар болып өсуі.
Президент Қасым-Жомарт Тоқаев тәуелсіз елде өсіп келе жатқан жаңа буынды «рухы азат, көзі ашық, көкірегі ояу ұрпақ» деп сипаттап, олар еліміздің ұлт ретінде жаңғыруына қызмет етеді деген зор сенім білдірді. Мемлекет жаңа буынның осындай биік қасиеттерін бағалап қана қоймай, оларды әрі қарай дамыту үшін барлық жағдайды жасап отыр. Ендеше, жас өркеннің бойында адалдық пен жауапкершілік орнықса, ел болашағының еңсесі биік, мәртебесі жоғары боларына күмән жоқ.
Дариха Үмбетиярова, журналист
