Ұлттық домбыра күніне орай Жамбыл облыстық көзі көрмейтін және әлсіз көретін азаматтар кітапханасы облыстық «Мөлдір бұлақ» оқу-сауықтыру орталығында «Домбыра жолы» атты танымдық квест ойынын ұйымдастырды.
Іс-шараның басты мақсаты – жас ұрпақтың қазақтың қасиетті қара домбырасына деген құрметін арттыру, ұлттық өнер мен мәдени мұраны насихаттау, сондай-ақ балалардың логикалық ойлау қабілетін, тапқырлығын және командалық ынтымақтастығын дамыту болды.
Квесттің басты ерекшелігі – оның инклюзивті форматта ұйымдастырылуы. Лагерь демалушыларының қатарында зағип және әлсіз көретін балалардың болуы іс-шараның мазмұнын ерекше мәнге ие етті. Барлық қатысушыға тең мүмкіндік қарастырылып, балалар бір-біріне қолдау көрсете отырып, ұлттық құндылықтарды бірге танып, ортақ мақсатқа ұмтылды.
Қатысушылар арнайы әзірленген карта арқылы бағыт алып, «QR-күй», «Emoji күй», «Dombyra Battle» және «Домбыраның құпиясы» атты бекеттерден өтті. Әр кезеңде олар домбыраның шығу тарихы, қазақтың әйгілі күйлері мен күйшілері, ұлттық салт-дәстүрлер мен мәдени мұраға қатысты қызықты тапсырмаларды орындап, білімдері мен тапқырлықтарын көрсетті.
Тартысты әрі танымдық сипатта өткен ойын соңында барлық қатысушы үш топ І, ІІ және ІІІ орындарға ие болып, алғыс хаттармен және естелік сыйлықтармен марапатталды.
«Домбыра жолы» квесті балалардың бос уақытын мазмұнды ұйымдастырумен қатар, ұлттық рухты нығайтып, домбыраның халқымыздың рухани өміріндегі айрықша орнын дәріптеуге ықпал етті. Сонымен қатар, инклюзивті ортада өткен бұл шара әр баланың қоғам өміріне белсенді араласуына мүмкіндік беріп, өзара сыйластық пен қолдаудың, тең мүмкіндіктің және бірліктің жарқын үлгісіне айналды.
