Жамбыл облысының орталығы – Тараз қаласында «Жаңа Конституция – жарқын болашаққа!» атты мерекелік концерт өтті. Салтанатты шараға мыңдаған тараздық қатысты.
Жиында өңір басшысы тұрғындарды еліміздің жаңа Конституциясының күшіне енуімен құттықтап, оның мемлекет дамуы үшін тарихи маңызына тоқталды.
– Жаңа, халықтық Конституция мемлекетіміздің одан әрі дамуына, экономикалық өсімнің артуына және қоғамдағы оң өзгерістердің нығаюына жол ашады. Бұл – Әділетті, Таза әрі Қауіпсіз Қазақстанды құрудың берік негізі. Біз жаңа құжатты ғана емес, жаңа қоғамдық келісім мен жаңа саяси мәдениетті қалыптастыру жолын таңдадық. Бұл – халқымыздың бірлігі мен жарқын болашаққа деген сенімінің айқын көрінісі.
Баршаңызды жаңа Конституцияның күшіне енуімен тағы да құттықтаймын! Жаңа Ата Заңымыз еліміздің өркендеуіне, халқымыздың ынтымағы мен берекесінің нығаюына, өскелең ұрпақтың жарқын болашағына қызмет ете берсін! – деді облыс әкімі.
Мерекелік кеш барысында отансүйгіштік рухты асқақтататын әндер шырқалып, мың бұралған бишілердің әсерлі қойылымдары көрермендерге көтеріңкі көңіл күй сыйлады.
Концерт ақын Қадыр Мырза Әлінің сөзіне жазылған, композитор Ескендір Хасанғалиевтің «Атамекен» әнімен қорытындыланды.
Шара соңында жиналған жұртшылық ел болашағына сенім білдіріп, жаңа Конституцияның Қазақстанның тұрақты дамуы мен кемел келешегінің берік негізі болатынына тілектестік танытып тарқасты.
