Павлодар облысына жасаған жұмыс сапарымның екінші күні кварталішілік жылу желілерін қайта жаңғыртуды және бірқатар нысан жұмысын көруге арналды.
Мемлекет басшымыз Қасым-Жомарт Кемелұлының тапсырмасымен салынып жатқан Ертіс өзені арқылы өтетін жаңа автокөлік көпірі құрылысы бекітілген кестеге сәйкес жүргізілуде. Құрылыс-монтаж жұмыстары 60%-ға орындалған. Жаңа көпір жол қозғалысы қауіпсіздігін, өңірдің транзиттік әлеуетін нығайтады.
Павлодардағы жылу және электрмен жабдықтау нысандарын қайта жаңғырту үшін 16 жоба қолға алынған, 92,4 шақырым инженерлік желілерді жаңарту жоспарланған. Мемлекет басшымыздың, Үкіметтің қолдауының арқасында соңғы үш жылда тозған жылу желілері 82,1%-дан 78,2%-ға дейін азайды.
Тұрғындар сапалы әрі уақытылы коммуналдық қызмет алуы, ол үшін инфрақұрылым сақадай сай болуы тиіс. Жауапты кезеңге дайындық барысында барлық мәселе ескерілуі керек.
Қазақстан электролиз зауыты еліміздің алюминий кластеріндегі негізгі өндірістік буын болғандықтан, заманауи экологиялық талаптарға сай, газ тазарту қондырғыларының тиімділігі 99,9%-ға жетеді.
Зауытқа барғанда кәсіпорынды одан әрі дамыту, инвестициялық жобаларды жүзеге асыру жайын, отандық металлургия саласының бәсекеге қабілеттілігін арттырудағы маңызды мәселелерді талқыладық.
Павлодардағы жаңа «Достық» шағын ауданына 18 көпқабатты тұрғын үй салынып, халық қоныстанған. 1 200 орындық мектебі, шағын орталығы да бар. Тағы да тұрғын үйлер бой көтеріп келеді. Жаңа шағын ауданға балабақшалар мен мектеп, мұз аренасы, көпфункционалды конгресс-холл және заманауи спорт кешені салынады. Облыс орталықтарындағы осындай жаңа шағын аудандар — халықтың тұрмыс сапасын арттыруға бағытталған маңызды қадам.
Сапар барысында еліміздің энергетикалық қауіпсіздігін нығайтуда маңызды рөл атқаратын Павлодар мұнай-химия зауытын, әуежайдың ұшу-қону жолағын қайта жаңғырту барысын көріп шықтым. Әуежайдағы жұмыстардың 72%-ы біткен. Қалған жұмысты да белгіленген мерзімде, сапалы етіп аяқтау керек.
Сапарымды қорытындылай келе, Энергетика министрлігі, «Самұрық-Қазына», «Самұрық-Энерго», «KEGOC» АҚ басшылығы, облыс әкімдері, орталық мемлекеттік органдар мен энергетика кәсіпорындары өкілдері қатысқан жиналыста жылу беру маусымына дайындықты пысықтадық.
Бұл — Мемлекет басшысының ерекше бақылауындағы мәселе. Жаздың әр күнін тиімді пайдаланып, жөндеу жұмыстарын белгіленген мерзімде аяқтау керек. Жаңа энергия өндіру қуаттарын уақытылы іске қосу, жылу, электр және сумен жабдықтау нысандарының, әлеуметтік инфрақұрылым мен тұрғын үйлердің дайындығы жіті бақылауда болуы маңызды.
Дәл осы уақытта атқарылған жұмыстардың нәтижесі көзге көрінетін кез алда. Сондықтан жауапты кезеңге әзірлік күн тәртібінен түспейді.
Нұрлыбек Нәлібаев, Премьер Министрінің бірінші орынбасары
(ақпарат әлеуметтік желідегі парақшасынан алынды)
