Мойынқұм ауданында мемлекеттік органдардың ақпараттық жұмысын жетілдіру, баспасөз хатшылары мен ақпараттық саясатқа жауапты мамандардың кәсіби біліктілігін арттыру мақсатында тәжірибелік семинар-тренинг ұйымдастырылды.
Іс-шараға Жамбыл облысы әкімінің кеңесшісі, журналист Исламбек Дастан, журналист әрі «Тараз» футбол клубының медиа және маркетинг бөлімінің басшысы Айжан Әуелбекова, Жамбыл облысы әкімінің баспасөз қызметінің маманы Нұрдәулет Асан және облыстық өңірлік коммуникациялар қызметінің маманы Алтынай Айтбек арнайы қатысып, өздерінің тәжірибелерімен бөлісті.
Семинар барысында қазіргі ақпараттық кеңістіктегі мемлекеттік органдардың рөлі, ресми ақпаратты халыққа жедел әрі сапалы жеткізу, әлеуметтік желілерді тиімді жүргізу, медиаконтент әзірлеудің заманауи тәсілдері, қоғаммен тиімді коммуникация орнату, дағдарыстық жағдайларда ақпараттық жұмысты ұйымдастыру және жалған ақпараттың алдын алу мәселелері жан-жақты талқыланды.
Спикерлер қатысушыларға теориялық мәліметтермен қатар тәжірибеде қолдануға болатын нақты мысалдар мен тиімді әдіс-тәсілдерді таныстырып, мемлекеттік мекемелердің ақпараттық қызметін жетілдіруге қатысты өз ұсыныстарын жеткізді. Сонымен қатар әлеуметтік желілердегі аудиториямен жұмыс істеу, фото және бейнематериалдарды сапалы әзірлеу, ресми ақпаратты көпшілікке тартымды форматта ұсыну, медиажоспар құру және ақпараттық тәуекелдерді басқару бағытында практикалық дәрістер өткізілді.
Семинар-тренингке ауданға қарасты 16 ауылдық округтің әкімдері аппараттарының, мемлекеттік мекемелердің және ақпараттық жұмысқа жауапты бөлімдердің мамандары қатысты. Қатысушылар өзара тәжірибе алмасып, күнделікті қызмет барысында кездесетін мәселелерді талқылап, оларды шешудің тиімді жолдары бойынша пікір алмасты.
Іс-шара соңында ақпараттық саладағы белсенділігімен ерекшеленген мамандар марапатталып, кәсіби қызметінде жоғары нәтиже көрсетіп жүрген қызметкерлерге арнайы сыйлықтар табысталды. Сондай-ақ барлық қатысушыларға ақпараттық жұмысты ұйымдастыруға арналған әдістемелік материалдар ұсынылды.
Мұндай тәжірибелік семинарлар мемлекеттік органдардың ақпараттық саясатын жетілдіруге, мамандардың кәсіби құзыреттілігін арттыруға және мемлекеттік мекемелер мен қоғам арасындағы ашық әрі тиімді байланысты нығайтуға мүмкіндік береді. Бұл өз кезегінде халыққа ұсынылатын ақпараттың сапасын арттырып, мемлекеттік органдар қызметінің ашықтығы мен жариялылығын қамтамасыз етуге оң ықпал етеді.
