Бұл сауал бүгінде әрқайсымызды ойландыруы тиіс. Жасанды интеллект қарқынды дамып жатқан кезеңде еңбек нарығы да түбегейлі өзгеруде. Кейбір мамандықтардың маңызы азайып, енді біреулері мүлде жойылуы мүмкін. Ал олардың орнына жаңа дағдылар мен жаңа кәсіптерге негізделген тың мамандықтар пайда болады.
Осы өзекті тақырып «Ембімұнайгаз» АҚ-на қарасты «Мұнайшы қыз» клубының ұйымдастыруымен «Жылыоймұнайгаз» мұнай-газ өндіру басқармасының ұжымы арасында өткен мазмұнды семинарда кеңінен талқыланды. Семинар спикері С.Өтебаев атындағы Атырау мұнай және газ университетінің Біліктілікті арттыру және қосымша білім беру институтының директоры Ақмарал Жалғасбаева – бұл бағытты 10 жылдан астам уақыт бойы зерттеп, еңбек нарығындағы өзгерістерді жан-жақты саралап жүрген кәсіби маман.
Кездесу барысында қатысушыларға маңызды ой тасталды: «Диплом алдым, жоғары білімім бар, маған жеткілікті»деген түсінікпен жүрсеңіз, көштен қаласыз. Қазіргі заманда білімдіүнемі жаңартып отыру және өзгерістерге бейімделу ең маңызды қабілетке айналды. Семинар барысында қатысушыларға «Жаңа мамандықтар атласы» таныстырылды. Бұл атлас – болашақ мамандықтар әлеміне бағыт-бағдар беретін, мамандық таңдаудан бастап кәсіби дамуға дейінгі маңызды ақпараттарды қамтитын құнды құрал. Онда еңбек нарығындағы өзгерістер, сұранысқа ие болатын жаңа кәсіптер, сондай-ақ бүгіннен бастап қандай дағдыларды дамыту қажеттігі жөнінде пайдалы кеңестер ұсынылған. Өзгерістерге бейімделіп, заман талабына сай білім мен біліктілігін жетілдіруді мақсат еткен кез-келген жан одан өзіне қажетті әрі пайдалы мәлімет таба алады. Мұнайшылардың атласқа деген қызығушылығы ерекше болды. Семинар барысында олар спикерге болашақтағы мамандықтар, жасанды интеллекттің еңбек нарығына әсері, қайта даярлану мүмкіндіктері мен жаңа дағдыларды меңгерудің маңызы туралы жан-жақты сауалдар қойып, ашық пікір алмасты. Бұл олардың кәсіби дамуға, өзгерістерді түсінуге және болашаққа дайын болуға деген жоғары қызығушылығын көрсетті.