istockphoto.com
Павлодар облысындағы сүт фермасының кәріз құдығында қаза тапқан жұмысшылардың үшеуі бір отбасының мүшелері болған, деп хабарлайды turkystan.kz.
Қайғылы оқиға Жоламан ауылында болған. Кәріз құдығына ферманың алты қызметкері түскен, олардың бесеуі көз жұмды. Қаза тапқандардың үшеуі – бір отбасының мүшелері: 51 жастағы әке және оның 17 және 20 жастағы ұлдары. Ауыл тұрғындарының айтуынша, 28 жастағы тағы бір ер адам да сол әулеттің туысы болған. Аман қалған жалғыз 38 жастағы жұмысшы көмірқышқыл газынан уланып, ауруханаға жеткізілді.
Оқиға орнына Павлодар облысының әкімі Асайын Байханов барды. Ол құзырлы органдарға оқиғаны жан-жақты әрі объективті тергеп, кінәлілердің жауапкершіліктен жалтармауын қамтамасыз етуді тапсырды. Кәсіпорын иесі қаза тапқандардың отбасыларына материалдық көмек көрсетілетінін мәлімдеді.
«Қаза тапқандардың отбасыларына мемлекеттік органдар тарапынан да, жұмыс беруші тарапынан да жан-жақты қолдау көрсетіледі. Оларға арнайы материалдық көмек беріледі, жыл соңына дейін жалақысы төленеді, сондай-ақ қолданыстағы несиелерін өтеуге көмек көрсетіледі. Бұдан бөлек, компания кәмелетке толмаған балалардың 18 жасқа дейінгі күтімі мен оқуына байланысты шығындарды өз мойнына алады», – деп хабарлады облыс әкімдігінің баспасөз қызметі.
Еске салайық, 20 шілде күні күндіз кәріз құдығындағы электр сорғысының ақауын жөндеу кезінде 1963, 1975, 1983, 1998, 2006 және 2009 жылы туған алты адам қаза тапты. Ал 1988 жылы туған тағы бір ер адам Ақтоғай аудандық ауруханасына жеткізілді.
Толық нұсқасына гиперсілтеме беруді ұмытпаңыз: https://turkystan.kz/article/285038-sut-fermasyndagy-6-adamnyn-olimine-qatysty-tyn-derek-syqty
