Таразда жаңа туристік нысан ашылды: құны 1,3 млрд теңгелік «ZERBULAQ» қонақ үйі пайдалануға берілді
Бүгін Тараз қаласында жаңа туристік нысан – «ZERBULAQ» қонақ үй кешені салтанатты түрде пайдалануға берілді. Ашылу рәсіміне Тараз қаласы әкімінің орынбасары Гүлдана Жауынбекова арнайы қатысып, жоба авторларын құттықтап, қала тұрғындары мен қонақтарына ізгі тілегін жеткізді, деп хабарлайды baq-orda.kz.
Өз сөзінде Гүлдана Әлімжанқызы мұндай заманауи нысандардың ашылуы Тараз қаласының туристік әлеуетін арттырып, өңірдегі қонақжайлық индустриясының дамуына тың серпін беретінін ерекше атап өтті. Сондай-ақ, ол жеке инвестиция есебінен жүзеге асқан жобалардың өңір экономикасының дамуына, жаңа жұмыс орындарының құрылуына және қызмет көрсету сапасының жақсаруына оң әсер ететінін айтты.
Жобаның жалпы құны 1,3 миллиард теңгені құрайды. Қонақ үй кешені тұрғындар мен қала қонақтарының жайлы демалысын ұйымдастыруға арналған көпфункционалды орталық ретінде қызмет көрсетеді. Мұнда келушілерге сапалы қызмет ұсынуға бағытталған барлық қажетті жағдай жасалған.
Кешен құрамында заманауи аквапарк, балалар мен ересектерге арналған демалыс аймақтары, ойын-сауық орындары, қоғамдық тамақтану және түрлі сервистік қызмет көрсету нысандары қарастырылған. Бұл тұрғындардың бос уақытын тиімді әрі мазмұнды өткізуіне, отбасылық демалысты ұйымдастыруға және қалаға келетін туристердің қызығушылығын арттыруға мүмкіндік береді.
Қонақ үйдің бөлмелері халықаралық талаптарға сай жабдықталған. Әрбір бөлмеде жайлы жиһаз, қажетті тұрмыстық техника, жоғары жылдамдықтағы интернет желісі және заманауи инженерлік инфрақұрылым қарастырылған. Сонымен қатар, қонақтардың қауіпсіздігі мен жайлылығын қамтамасыз ету мақсатында тәулік бойы қызмет көрсететін сервистік жүйе енгізілген.
Айта кетейік, аталған нысан «South Holiday» ЖШС құрылтайшысы Айбек Оршубековтің жеке инвестициясы есебінен бой көтерген. Жоба өңірдегі туризмді дамытуға, кәсіпкерлікті қолдауға және инвестициялық тартымдылықты арттыруға бағытталған маңызды бастамалардың бірі саналады. Жаңа кешеннің іске қосылуы Тараз қаласының туристік инфрақұрылымын дамытуға елеулі үлес қосып, келушілерге сапалы әрі заманауи қызмет көрсету мүмкіндігін кеңейтеді.
https://baq-orda.kz
