Талас ауданында «Қоғамда сыбайлас жемқорлыққа қарсы мәдениетті қалыптастыруға бағытталған іс-шараларды ұйымдастыру» мемлекеттік әлеуметтік тапсырысы аясында бизнес өкілдерінің қатысуымен дөңгелек үстел өтті.
Іс-шара Жамбыл облысы әкімдігінің Ақпарат және қоғамдық даму басқармасының қолдауымен «Адал қоғам» қоғамдық бірлестігінің ұйымдастыруымен өткізілді.
Дөңгелек үстелге «Әділдік жолы» республикалық қоғамдық бірлестігінің Жамбыл облыстық филиалының жетекшісі Назима Дәрменқызы қатысып, сыбайлас жемқорлықтың алдын алу, кәсіпкерлік саласында ашықтық пен адалдық қағидаттарын нығайту, құқықтық мәдениетті қалыптастыру бағытында баяндама жасады.
Кездесу барысында кәсіпкерлік қызметте сыбайлас жемқорлық тәуекелдерін азайту, мемлекеттік органдар мен бизнес арасындағы ашық әрі тиімді өзара іс-қимылды дамыту, сондай-ақ қоғамда сыбайлас жемқорлыққа қарсы мәдениетті қалыптастырудың маңыздылығы талқыланды. Қатысушылар өзара пікір алмасып, ұсыныстарын ортаға салды.
Осындай іс-шаралар адал кәсіпкерлік қағидаттарын ілгерілетуге, қоғамдағы ашықтық пен әділдік құндылықтарын нығайтуға және сыбайлас жемқорлыққа қарсы мәдениетті қалыптастыруға өз үлесін қосады.
