Қазақстанның шпагамен семсерлесуден ерлер құрамасы Гонконгте өтіп жатқан әлем чемпионатында тарихи жеңіске жетті. Ұлттық құрама финалда Украина спортшыларын 45:40 есебімен жеңіп, ел тарихындағы алғашқы алтын медальді иеленді, деп хабарлайды Tizgin.kz Туризм және спорт министрлігіне сілтеме жасап.
Финалға дейін бес қарсыласын жеңді
Әлем чемпионатында Қазақстан намысын Руслан Курбанов, Ерлік Сертай, Кирилл Проходов және Вадим Шарлаимов қорғады.
Ұлттық құрама жарыс барысында бес кездесу өткізіп, барлығында жеңіске жетті. Қазақстандық шпагашылар 1/16 финалда Финляндия құрамасынан 45:39 есебімен басым түсті. Келесі кезеңде Өзбекстан спортшыларымен өткен тартысты кездесуде 28:27 есебімен жеңіске жетті.
Ширек финалда Дания құрамасын 45:36 есебімен ұтқан қазақстандықтар жартылай финалда Мысыр спортшыларын 41:32 есебімен жеңді. Ал шешуші бәсекеде Украина құрамасынан 45:40 есебімен басым түсіп, әлем чемпионы атанды.
Қазақстан семсерлесуіндегі тарихи нәтиже
Бұл – Қазақстан құрамасының ересектер арасындағы әлем чемпионатында жеңіп алған алғашқы алтын медалі. Бұған дейін ұлттық команда әлем біріншілігінің финалына шығып көрмеген.
Қазақстандық шпагашылардың бұған дейінгі ең жоғары нәтижесі – қола медаль. Былтыр Тбилисиде өткен әлем чемпионатында ұлттық құрама үшінші орын үшін өткен кездесуде Франция командасын жеңген еді.
Қазір Қазақстанның ерлер құрамасы Халықаралық семсерлесу федерациясының (FIE) әлемдік рейтингінде бесінші орында тұр. Гонконгтегі тарихи жеңіс ұлттық құраманың әлемдегі жетекші командалардың қатарына қосылғанын тағы бір мәрте дәлелдеді.
Фото: Туризм және спорт министрлігі
