Жуалы ауданындағы №91678 әскери бөлімінде әскери қызметшілермен «Заң және тәртіп – қауіпсіз қоғамның кепілі» тақырыбында кездесу өтті. Іс-шараның негізгі мақсаты – әскери қызметшілердің құқықтық сауаттылығын арттыру, әскери тәртіпті нығайту және құқық бұзушылықтың алдын алу болды.
Кездесуге Жуалы ауданы әкімінің орынбасары Анар Ахметова, аудандық полиция бөлімінің бірінші орынбасары Ринат Заппаров және Жуалы аудандық төтенше жағдайлар бөлімінің аға анықтаушысы, азаматтық қорғау капитаны Бақтияр Мағыртай қатысты.
Кездесуде сөз сөйлеген Анар Ахметова заң талаптарын сақтау тұрақты әрі қауіпсіз қоғамның басты негізі екенін атап өтті. Ол Қазақстанда 2025–2030 жылдарға арналған «Заң және тәртіп» тұжырымдамасы қабылданғанын айтып, оның негізгі мақсаты – заң үстемдігін нығайту, құқық қорғау органдарының жұмыс тиімділігін арттыру, азаматтардың қауіпсіздігін қамтамасыз ету және құқық бұзушылықтардың алдын алу екенін жеткізді. Сондай-ақ әскери қызметшілер Әскери антқа адал болып, тәртіпті қатаң сақтап, қызметіне жауапкершілікпен қарап, кәсіби және рухани тұрғыдан үнемі жетіліп отыруы қажет екенін айтты.
Аудандық полиция бөлімінің бірінші орынбасары Ринат Заппаров құқық бұзушылықтардың алдын алу бағытында атқарылып жатқан жұмыстар туралы айтып, қоғамдық тәртіп пен заң талаптарын сақтау әрбір азаматтың ортақ міндеті екенін атап өтті. Кездесу барысында әскери қызметшілерге әкімшілік және қылмыстық жауапкершілік мәселелері түсіндіріліп, интернет-алаяқтықтың кең таралған түрлері, әлеуметтік желілерді қауіпсіз пайдалану және жеке деректерді қорғаудың маңыздылығы жөнінде ақпарат берілді.
Жуалы аудандық төтенше жағдайлар бөлімінің аға анықтаушысы Бақтияр Мағыртай төтенше жағдайлардың алдын алу және өрт қауіпсіздігі талаптарын сақтау мәселелеріне тоқталды. Ол электр құралдарын қауіпсіз пайдалану, төтенше жағдайлар кезінде дұрыс әрекет ету тәртібі туралы айтып, әскери бөлім аумағында ғана емес, күнделікті өмірде де қауіпсіздік талаптарын қатаң сақтаудың маңызын ерекше атап өтті.
Кездесу соңында әскери қызметшілер өздерін толғандырған сұрақтарын қойып, мамандардан жан-жақты жауап алды. Ұйымдастырушылардың айтуынша, мұндай кездесулер алдағы уақытта да тұрақты түрде өткізілетін болады. Себебі заңды құрметтеу, әскери тәртіп пен қауіпсіздік талаптарын сақтау – қоғамдық тұрақтылық пен ел қауіпсіздігін қамтамасыз етудің маңызды шарттарының бірі.
baq-orda.kz.
