Алакөлде бірнеше күн бойы іздеуде болған 44 жастағы Руслан Мусагалиевтің денесі табылды, деп хабарлайды Politico.kz.
Ер адам Алакөлге жұбайы, үш баласы және әкесімен бірге демалуға келген. 17 тамыз күні кешкі уақытта ол «серуендеп келемін» деп демалыс орнынан шығып, қайта оралмаған.
Туыстарының айтуынша, Руслан көлге шомылмаған. Бейнебақылау камераларынан оның Арбат маңында жүргені анықталған. Кейін ер адамның телефоны өшірулі болған. Ұялы телефонын жергілікті жасөспірім Алакөл жағалауынан тауып, демалыс орнының күзетшісіне тапсырған.
Іздеу жұмыстары 18 тамызда басталды. Оған полиция қызметкерлері, төтенше жағдайлар қызметі, әскери қызметшілер мен еріктілер жұмылдырылып, арнайы көліктер мен дрондар пайдаланылған.
Бірнеше күнге созылған іздеу нәтижесінде ер адамның денесі демалыс орындарынан шамамен 200 метр қашықтықтағы қалың ағаштардың арасынан табылды.
Абай облысының полиция департаменті бұл факті бойынша сотқа дейінгі тергеу басталғанын хабарлады. Қазір оқиғаның барлық мән-жайы анықталып жатыр.
Туыстары Русланның денсаулығына байланысты мәселелері болғанын және жоғалар алдында өзін жайсыз сезінгенін айтқан.
Полиция әлеуметтік желілерде тараған кейбір ақпараттарды да жоққа шығарды. Ведомствоның мәліметінше, ер адамның телефоны елді мекеннен емес, тікелей Алакөл жағалауынан табылған.
Полиция азаматтарды тек ресми ақпаратқа сеніп, расталмаған мәліметтерді таратпауға шақырды.
Дереккөз: https://politico.kz/kz/article/alakolde-zhogalyp-ketken-44-zhastagy-er-adamnyn-denesi-tabyldy?fbclid=IwY2xjawT2PZRwZG9mBWV4dG4DYWVtAjExAHNydGMGYXBwX2lkEDIyMjAzOTE3ODgyMDA4OTIAAR7N0LKz3c7gzcQ3G1pcRyvc0HtXvaA9M2CLHYsLUSeYkrMDvykzR167FWmiRg_aem_cfczweklwnFZ3Y6mw6RaNQ
ФОТО: Әлеуметтік желіден
