Бүгін елімізде алғаш рет Құрылтай сайлауы өтуде. Соған орай белгілі ақын, журналист, Халқаралық «Алаш» сыйлығының иегері, Қазақстан Жазушылар одағының мүшесі Ғайни Әлімбекқызы «Ұлы дала» шағынауданында орналасқан №505 сайлау учаскесінде өз таңдауын жасады.
– Бүгін еліміз үшін тарихи күн. Алғаш рет Құрылтай сайлауы өтіп жатыр. Қазақстан Республикасының азаматы ретінде өз таңдауымды жасадым. Бұл – әр азаматтың ел болашағына деген жауапкершілігін танытатын маңызды қадам. Сайлаудан күтеріміз көп. Ең бастысы, халықтың үмітін ақтап, елдің дамуына, халықтың әл-ауқатын арттыруға бағытталған игі бастамалар жүзеге асса екен деймін. Әрбір дауыс – ел болашағына қосылған үлес, – деді ақын.
Айта кетейік, аталған сайлау учаскесінде барлығы 2 494 сайлаушы болса, оның ішінде 18 жасқа енді толған 34 адам алғаш рет өз таңдауларын жасайды.
