Білім күніне орай №67 орта мектепте «Қазақстан Республикасының Конституциясы: Адал азамат, зерделі ұлт және жауапты қоғам қалыптастырудың негізі» атты мерекелік іс-шара өтті. Салтанатты шараға Тараз қаласының әкімі Бақытжан Орынбеков арнайы қатысып, ізгі тілегін жеткізді.
Биыл қалада 98 мыңнан аса оқушы жаңа оқу жылын бастаса, оның ішінде 8 789 бүлдіршін мектеп табалдырығын алғаш рет аттап отыр.
Өткен оқу жылы қала мектептері үшін толайым табыстарға толы болды. Көптеген оқушылар халықаралық, республикалық білім бәсекесінде жеңімпаз атанып, жүлделі орындарға қол жеткізді.
Сондай-ақ бірқатар мектепте орын тапшылығы мен оқу кабинеттерінің жетіспеушілігі толық шешімін тапты. Атап айтқанда, №27 орта мектептің жанынан 600 орынды жаңа ғимарат салынса, №54 орта мектеп заманауи үлгіде қайта жөндеуден өткізілді. Нәтижесінде шаһар аумағында соңғы үш жылда 7 жаңа мектеп, 2 жапсарлас ғимарат пайдалануға берілді. Осы ретте 4 білім ордасы Мемлекет басшысының тапсырмасымен басталған «Келешек мектептері» жобасы аясында бой көтергенін ерекше атап өтейік.
Бұл бағыттағы жұмыстарды әрі қарай жалғастыру мақсатында келер жылға қаржы мүмкіндіктерін қарастырып, тағы 7 мектепке күрделі жөндеу жұмыстарын жүргізу жоспарланып отыр.
Мерекелік шара соңында шаһар басшысы білім ордасын аралап, жаңа оқу жылына табыс тіледі.
