Қазақстан Жазушылар одағының мүшесі, жазушы, өлкетанушы Сәмен Құлбарақтың 70 жылдық мерейтойына арналған «Әдебиет – ізгіліктің бастауы» атты шығармашылық бенефис кеші өтті.
Әдебиет пен ұлттық руханиятты, ел тарихы мен туған жер тағылымын арқау еткен тағылымды кеш жазушының жетпіс жылдық ғұмырын, шығармашылық жолын және қазақ әдебиетіне қосқан үлесін кеңінен насихаттауға арналды.
Кеш шымылдығы М.Х. Дулати атындағы Тараз университеті студенттерінің орындауындағы Сәмен Құлбарақтың жаңа «Мұхаммед Хайдар» тарихи романының желісі бойынша дайындалған театрландырылған қойылыммен ашылды. Тарихи тұлғаның өмірі мен дәуірін көркем сахналық көрініс арқылы таныстырған қойылым көрерменге ерекше әсер сыйлады.
Театрландырылған көріністен кейін кеш жүргізушісі жазушының жаңа туындысынан алынған көркем үзіндінің бүгінгі басқосудың мән-мағынасын ашып тұрғанын атап өтіп, мерейтой иесі Сәмен Құлбарақты сахна төріне шақырды. Бұдан соң қаламгердің өмірі мен шығармашылық жолына арналған арнайы бейнеролик көрсетіліп, көрермен назарына оның әдебиет пен руханият саласындағы көп жылғы еңбегі ұсынылды.
Мерейтой иесін облыс әкімдігінің мәдениет және тілдерді дамыту басқармасының басшысы Ерлан Жүнісбай алғашқылардың бірі болып құттықтап, облыс әкімінің құттықтауын жеткізді. Өз сөзінде ол Сәмен Құлбарақтың өңірдің рухани-мәдени өміріне қосып келе жатқан еңбегіне тоқталып, қаламгерге шығармашылық табыс, мықты денсаулық және жаңа белестер тіледі. Құттықтау сөзден кейін мерейтой иесіне арнайы шапан жабылып, құрмет көрсетілді.
Сондай-ақ кеш барысында білім мен ғылым саласының дамуына үлес қосып жүрген М.Х. Дулати атындағы Тараз университетінен проректор Мақсат Несіпжанұлы Сәмен Құлбарақты 70 жылдық мерейтойымен құттықтап, қаламгердің шығармашылық еңбегіне жоғары бағасын берді. Сондай-ақ жиынға келген Дулати университетінің жастары ғалымға деген құрметін бір жетпіс рет қол соғып, шаттық авацияларын жеткізді. Сондай-ақ шараға Шерхан университетінің де жастары ат салысып, тағлымды жиынның куәсі болды.
Мерейтой иесімен болған мазмұнды сұхбат барысында оның әдебиетке келу жолы, шығармашылық ұстанымы, тарихи тақырыптарға деген қызығушылығы және жазушылық ізденісі сөз болды. Әсіресе қаламгердің бірнеше жылдық ізденісінің жемісі болған «Мұхаммед Хайдар» тарихи романының жазылу тарихы кеңінен әңгімеленді. Сәмен Құлбарақ тарихи дерек пен көркем қиянды сабақтастыра отырып, ұлы тұлғаның өмірі мен дәуірін көркем шығарма арқылы танытуды мақсат еткенін айтты.
Кеш барысында филология ғылымдарының докторы, профессор, академик Жанғара Дәдебаев сөз сөйлеп, мерейтой иесінің шығармашылығына тоқталып, қаламгердің әдебиет пен руханияттағы орнына жоғары баға берді. Сонымен қатар ол Сәмен Құлбарақтың жаңа кітабын көпшілікке таныстырып, оның оқырманға жол тартқанын атап өтті. Осыдан кейін кітапхана мен мәдениет саласының қызметкерлері жаңа туындыны көпшілікке таратты.
Мерейтой иесін Қазақстан Жазушылар одағының хатшысы, «Қазақ әдебиеті» газетінің бас редакторы Бауыржан Жақып, филология ғылымдарының докторы, профессор, Қазақстан Ғылым академиясының академигі Қансейіт Әбдезұлы, әл-Фараби атындағы Қазақ ұлттық университетінің Жамбылтану орталығының директоры Алмасбек Анықбекұлы құттықтап, Сәмен Құлбарақтың шығармашылық еңбегіне, ұлттық әдебиет пен руханиятқа сіңірген қызметіне тоқталды.
Кештің жалғасында жазушы, драматург, публицист Елен Әлімжан, ақын Қайырбек Асанов, жазушы Көсемәлі Сәттібайұлы, М.Х. Дулати атындағы Тараз университетінің доценті, филология ғылымдарының кандидаты Темірбай Мұқашев сөз сөйлеп, мерейтой иесіне жүрекжарды тілектерін жеткізді. Қаламдас замандастары мен әріптестері Сәмен Құлбарақтың азаматтық болмысы, шығармашылық ізденісі, әдебиетке деген адалдығы және туған жер тарихын зерттеудегі еңбегі жайлы жылы естеліктерімен бөлісті.
Кеш соңында Сәмен Құлбарақ өзіне көрсетілген құрмет пен ыстық ықыласқа ризашылығын білдіріп, мерейтойына арнайы келген барша азаматтарға алғыс айтты. Ол әдебиеттің адамды ізгілікке тәрбиелейтінін, ал тарихи шығармалардың ұлттың өткенін танып, келешекке сабақ алуға жол ашатынын атап өтті.
