«Бюджетке шығын келтіру, адамды әурелеу»: Аймағамбетов медицинадағы артық рәсімдерді атады

Депутат мысал ретінде денсаулық жағдайы тұрақты әрі қайтымсыз сипат алған адамның мүгедектігін қайта растау үшін ауруханаға жатқызылуын атады. Бұған дейін мұндай азамат медициналық-әлеуметтік сараптамаға жолдама алу үшін дәрігерге жазылып, талдау тапсырып, аурухана кезегіне тұрып, кейін медициналық қажеттілік болмаса да қайта тексеруден өтуге мәжбүр болған.

Аймағамбетовтің сөзінше, бұл мәселені былтыр Құрылтайдың тиісті комитеті көтерген. Кейін Денсаулық сақтау және Еңбек министрліктерімен бірлесіп, заңға тәуелді актілерге өзгерістер енгізу арқылы шешім табылған.

Депутат медицинадағы тағы бір артық талапқа назар аударды. Оның айтуынша, жүрек ауруына қатысты қауіп болмаса да, онкологиялық ауруханаға жатқызылар алдында науқастан міндетті түрде электрокардиограмма, эхокардиографиядан өту және кардиолог кеңесін алу талап етіледі.

Аймағамбетов Қарағандыдағы бір онкологиялық орталықтың өзінде жыл сайын шамамен 17 мың науқас ауруханаға жатқызылатынын айтты. Оның сөзінше, мұндай талап мыңдаған қайталама тексеруге әкеледі. Ал олар жасалмаса, медициналық ұйымға Әлеуметтік медициналық сақтандыру қоры тарапынан шара қолданылуы мүмкін.

Дәрігерлер зерттеу нәтижелерінің жарамдылық мерзімін бірнеше айға дейін ұзартуды, ал қайта тексеруді тек медициналық көрсетілім болған жағдайда жүргізуді ұсынып отыр.

Аймағамбетов мұндай мәселелерді тек цифрландыру арқылы шешу жеткіліксіз деп санайды.

«Артық рәсімді электронды форматқа көшіру оның артықтығын жоймайды. Ол тек электронды артық рәсімге айналады», – деп жазды депутат.

Оның пікірінше, медициналық-әлеуметтік сараптама жүйесін де қайта қарау қажет. Өзгерістер бір жағынан мүгедектікті негізсіз белгілеуге жол бермеуге, екінші жағынан мемлекеттік көмекке құқығы бар азаматтардың алдындағы артық кедергілерді азайтуға бағытталуы тиіс.

Аймағамбетов тиісті шешімдерді қабылдау бағытындағы жұмыс жалғасатынын мәлімдеді.

parlam.kz

qaz365.kz