Павлодар облысында 14 қыркүйектен бастап жылу маусымы басталды. Ал солтүстік және шығыс өңірлерде жылу ауа райына қарай 1 қазанға дейін кезең-кезеңімен беріледі. Дегенмен бірқатар қалада жөндеу жұмыстары әлі толық аяқталмаған. Бұл туралы Stan.kz ақпарат агенттігі хабарлайды.
Үкімет отырысында баяндама жасаған Энергетика министрі Ерлан Ақкенженовтің айтуынша, жөндеу жұмыстары бекітілген кестеге сәйкес жүргізіліп жатыр. Энергия көздерінде қажетті отын қоры жиналып, бірінші кезекте іске қосылатын жабдықтар айқындалған.
«Жалпы жылу желілерінің дайындығы 97%-ды құрайды. Жоспарланған 377 шақырымның 366 шақырымы жөнделді. Сәтбаевта өткен аптада жылу магистралін қайта жаңғырту аяқталып, қазір желіні шаю және қысыммен сынау жұмыстары жүріп жатыр. Петропавлдағы жылу магистральдарының дайындығы 95%-ға жетті. Семейде дайындық деңгейі 70%, ал Степногорскіде 76%-ды құрайды. Өңірлер қалған жөндеу жұмыстарын барынша қысқа мерзімде аяқтауы қажет», – деді Ерлан Ақкенженов.
Бұдан бөлек, 17 мың шақырым электр беру желісін жөндеу толық аяқталған. Тоғыз қосалқы станциядағы жұмыстар соңғы кезеңге жеткен.
Үкімет отырысында премьер-министр Олжас Бектенов өңір әкімдеріне жылу маусымына дайындықты жеке бақылауға алып, қалған жөндеу жұмыстарын белгіленген мерзімде аяқтауды тапсырды.
Фото: ChatGPT
https://stan.kz/zylu-mausymy-bastaldy-biraq-kei-onirde-zondeu-aiaqtalmagan-439962/
