Бектенов түнде қатты шу шығаратын көлік жүргізушілерін қатаң жазалауды тапсырды Бүгін, 12:12 / Інжу Әлихан istockphoto.com Үкімет отырысында жолдағы қауіпсіздік мәселесін қарау барысында Премьер-министр Олжас Бектенов автомобиль және мотокөлік жүргізушілерінің, әсіресе түнгі уақытта қатты шу шығаратын жүргізушілердің әрекетіне назар аударды, деп хабарлайды turkystan.kz.  «Ержан Сапарбекұлы, қатты шуылдайтын мото және авто көлік мәселесін неше рет өзіңізбен бірге талқыладық. Оларға өте қатаң шаралар қабылдау қажет. Әйтпесе түннің ортасында адамдардың мазасын алып, ұйқы бермей жатыр. Осыған байланысты қандай шаралар атқарып жатсыздар?», — деді Олжас Бектенов. Ішкі істер министрі Ержан Сәденов полицияның мұндай құқық бұзушылықтарды анықтау бағытында тәулік бойы жұмыс жүргізіп жатқанын айтты. Бұл істе бейнебақылау камералары сияқты цифрлық шешімдер көмектеседі. Сонымен қатар азаматтар 102 нөміріне хабарласып, мұндай фактілер туралы белсенді түрде хабарлайды. Жыл басынан бері осындай 782 дерек тіркелді. Барлық құқық бұзушы әкімшілік жауапкершілікке тартылып, 55 адам қамауға алынды. Сондай-ақ құқық бұзушылыққа қатысы бар көліктер мен мотоциклдер айыппұл тұрағына қойылады. Министр бұл бағыттағы жұмыстардың күшейтілетінін атап өтті. Премьер-министр осы бағытта жұмысты күшейтуді тапсырды. Толық нұсқасына гиперсілтеме беруді ұмытпаңыз: https://turkystan.kz/article/289124-bektenov-tunde-qatty-su-sygaratyn-kolik-zurgizusilerin-qatan-zazalaudy-tapsyrdy