Егін жинау науқанына арналған Үкіметтің баспасөз конференциясының негізгі қорытындылары
Қазақстанда орташа көпжылдық көлемнен жоғары астық жинау жоспарланудаҚазақстанда астық өнімі биыл орташа көпжылдық көрсеткіштерден жоғары болады деп күтілуде, деп хабарлады ауыл шаруашылығы вице-министрі Назгүл Хатепова.
Әр жылдары қазақстандық шаруалар шамамен 18-19 млн тонна астық жинады. Осы жылы ведомство астық орташа көпжылдық көлемнен жоғары болады деп күтіп отыр.
Бүгінгі таңда егіс алқаптарының шамамен 83%-ы жиналды, 20 млн тоннаға жуық астық бастырылды.
АШМ: өткен жылдардағы өнімнің қалдықтарын ескере отырып, жаңа өнімді сақтауға арналған қойма сыйымдылығы жеткілікті
Қазақстанда астықты сақтаудың ағымдағы қуаты 30,5 млн тоннаны құрайды және өткен жылдардың қалдықтарын ескере отырып, жаңа егіннің сақталуын толық көлемде қамтамасыз етеді, деп хабарлады ауыл шаруашылығы вице-министрі Назгүл Хатепова.
«Лицензияланған элеваторлардың сақтау қуаты – 13,1 млн тонна, ал ауыл шаруашылығы тауарын өндірушілердің астық қоймаларының сыйымдылығы – 17,4 млн тоннаны құрайды. Бүгінгі таңда 190-ға жуық лицензияланған элеватор жұмыс істейді. Ағымдағы сақтау сыйымдылықтары өткен жылдардағы егіннің ауыспалы қалдықтарын ескере отырып, жаңа егіннің астығының сақталуын қамтамасыз ету үшін толық көлемде жеткілікт»,
— деп атап өтті вице-министр.
Бүгінгі таңда сақтауға 4,9 млн тонна жаңа өнім түсті.
Биыл Қазақстанның картоп экспорты 400 мың тоннаға жетпекЖинау жұмыстарының қорытындысы бойынша картоптың жалпы көлемі өткен жылдың деңгейінде, яғни 2,8 млн тонна болады деп болжануда, деп хабарлады ауыл шаруашылығы вице-министрі Назгүл Хатепова.
Оның айтуынша, өткен жылы 388 мың тонна картоп экспортталған. Биыл экспорттық әлеует 400 мың тонна деп бағалануда.
«Бүгінгі таңда картоп өнімі 2,5 млн тонна көлемінде жиналды. Қарағанды және Павлодар облыстарының егістіктерінде бүгінгі күні картоп 90-100 теңгеден сатылуда. Сауда министрлігімен, әкімдіктермен және ірі сауда желілерімен бірлесіп фермерлерге артық картопты басқа елдерге экспорттауға мүмкіндік беру үшін қажетті көлемге алдын ала келісімшарт жасау бойынша жұмыстар жүргізілуде»,
— деп атап өтті вице-министр.
Қазақстандағы көкөніс қоймаларының қуаты маусымаралық қажеттілікті қамтамасыз етедіЕліміздегі көкөніс өнімдерін сақтауға арналған қолданыстағы қойма қуаттары оларды келесі өнім алынғанға дейін сақтауды толық қамтамасыз етуге жеткілікті. Бұл туралы ауыл шаруашылығы вице-министрі Назгүл Хатепова мәлімдеді.
«Жыл сайын Қазақстанда шамамен 2,8 – 3 млн тонна картоп және 2,5 – 3 млн тонна көкөніс өндіріледі. Маусымаралық кезеңде негізгі өнім түрлерін сақтау үшін шамамен 2,5 – 2,6 млн тонна сақтау сыйымдылығы қажет. Соңғы үш жылда 700 мың тоннадан астам жаңа сақтау қуаты іске қосылды. Бүгінде қолданыстағы қоймалардың сыйымдылығы осы қажеттілікті толық қамтамасыз етуге жеткілікті»,
– деді Назгүл Хатепова.
Оның айтуынша, сақтау, тасымалдау және жинау кезінде көкөніс өнімдерінің табиғи шығыны орта есеппен 5-10%-ды құрайды.
Сиыр етінің бағасы тұрақты сақталып отыр — АШМЕліміздің ішкі нарығы өзімізде өндірілетін сиыр етімен қамтамасыз етілген, бағаның күрт өсуіне негіз жоқ, деп хабарлады ауыл шаруашылығы вице-министрі Назгүл Хатепова.
«Республика бойынша сиыр етінің орташа бағасы келісіне 3,8 мың теңгені құрайды. Астанада ол 3,8 мың теңгеден жоғары. Бізде бағаның күрт өсуіне негіз жоқ. Ішкі нарық өз өндірісі есебінен толық қамтамасыз етілген. Апта сайын Ұлттық статистика бюросы, күн сайын Ауыл шаруашылығы министрлігі мониторинг жүргізеді»,
— деді Назгүл Хатепова.
Оның мәліметінше, өткен жылы елімізде 434 мың тонна сиыр еті өндірілген, осы жылы өндіріс көлемі өсуде. Жекелеген өңірлердегі бағалардың мерзімді ауытқулары тіркеледі, алайда қымбаттауға тұрақты үрдіс жоқ.
