«Жомарттағы» жеті кеншінің қазасы: сотта айыпталушының туыстары күтпеген мәлімдеме жасады
Сот алдында үш адам жауап беріп жатыр. Ұлытау облысындағы «Жомарт» кенішінде жеті кеншінің қазасына байланысты сот процесі жалғасып жатыр. 1 қазанда Жаңаарқа аудандық сотында іс бойынша сегізінші сот отырысы өтті. Сот алдында үш адам жауап беріп жатыр. Алайда сотқа келген тараптар апатты тексерген Үкіметтік комиссия актісінде 24 адамның аты аталғанын айтып, істің неліктен үш адамға қатысты ғана сотқа жеткеніне назар аударды.
Қайғылы оқиға 2025 жылғы 17 ақпанда Ұлытау облысы Жаңаарқа ауданындағы «Қазақмыс» корпорациясының «Жомарт» кенішінде болған. Шахтада тау массасы құлап, опырылған аумақтың ар жағында жеті жұмысшы қалып қойған.
Құтқару жұмыстарына Ұлытау және Қарағанды облыстарының төтенше жағдайлар қызметінің күштері тартылды. Шахтадағы 402 адам өздігінен эвакуацияланған.
Кейін үйінді астында қалған жеті жұмысшының да қаза тапқаны анықталды.
1 қазанда Жаңаарқа аудандық сотында осы апатқа қатысты істің сегізінші отырысы өтті.
Сотқа келген айыпталушылардың туыстары тергеудің қалай жүргізілгеніне қатысты сауалдары бар екенін жеткізді. Олардың сөзінше, апаттан кейін құрылған комиссия актісінде 24 адамның аты аталғанымен, кейін қылмыстық іс бойынша үш адам ғана қалған.
«Сол кезде Үкіметтік комиссия құрылып, тергеу жүргізілді. 24 адам кінәлі деп акт шыққан болатын. Содан кейін осы акт бойынша тергеу басталды. Сәтбаев қаласында тергеу жүргізілді. Сол тергеу кезінде 24 адамның ішінен үш адам қалдырылды. Оның екеуі — менің бауырым. Қазір іс сотта қаралып жатыр», — деді сотқа келген айыпталушы екі жігіттің ағасы Хамзат Жаналин.
Оның айтуынша, сот алдында жауап беріп жатқан адамдарға метан газына қатысты тексеру жүргізуге өтінім бермеді деген айып тағылып отыр.
«Оларды газ-метанға тексеріс бермеді деп кінәлап отыр. Газ туралы ақпаратқа қатысты да мәселе бар. Енді әділ төрелікті соттан күтеміз. Президент Қасым-Жомарт Тоқаев айтып жүрген “Әділетті Қазақстанның” қалай орындалатынын білмеймін. Төрелікті соттан күтеміз», — деді ол.
Бұл — сотқа келген айыпталушы туысының айтқан уәжі.
«Жеті адамның қазасына үш адамды кінәлі деп отыр»
Сот отырысына айыпталушылардың отбасы мүшелері де келген.
Солардың бірі — Нұрым Жаналиннің жұбайы Айгүл Хәкімжанова.
«Менің есімім — Хәкімжанова Айгүл Қалдыбекқызы. Жаналин Нұрымның жұбайымын. Бүгін, 1 қазан күні, сегізінші сот отырысына келіп тұрмыз. 2025 жылы Ұлытау облысындағы “Жомарт” кенішінде жарылыс болып, жеті адам қаза тапқан болатын. Бүгінгі таңда соған кінәлі деп үш адамды тауып отыр», — деді ол.
Сот маңында болған әңгімеде Үкіметтік комиссия жұмысына қатысты мәселе де көтерілді.
«Қанат Бозымбаев мырза құрған комиссияда 24 адам жауапты деп танылған. Ал дәл қазіргі сот отырысында үш адамның ғана есімін естіп отырмыз. Бұған не айтасыз?» — деген сауал қойылды.
Оған жауап берген қаза тапқан кеншілердің бірінің туысы бұл мәселені бұған дейін де көтергенін айтты.
«Осы мәселені былтырғы қыркүйектен бері айтып келе жатырмын. 24 адамның ішінен ең төменгі лауазымдағы үш адамды осы сотта кінәлі деп отыр. Мен бұл үш кісіні кінәлі деп ойламаймын. Кінәлілер үйлерінде жатыр. Мысалы, осы 24 адамның ішінде Нұриев бастаған үлкен лауазымдағы адамдар, бұрынғы бас директор болған. Қазір ол жұмыстан шықты. Бірақ олар бұл сотта жоқ», — деді ол.
Бұл да — жәбірленуші тарап өкілінің пікірі.
«Жәбірленушілер бұл үш адамға кінә артпайды»
Айгүл Хәкімжанова сот процесіндегі тағы бір жайтқа назар аударды. Оның сөзінше, қаза тапқан жеті кеншінің туыстары қазіргі айыпталушыларға кінә артпайтынын білдірген.
«Бүгінгі таңда менің жолдасымды, қайнағамды айыптап отырған — мемлекеттік айыптаушы, прокуратура. Ал бұл жерде жеті жәбірленуші, қаза тапқан кісілердің туыс-туғандары бұл кісілерге ешқандай кінә артып отырған жоқ. Өздерінің қолхаттарын жазып, бұл кісілердің ешқандай кінәсі жоқ екенін, істің әділ шешімін тауып, нағыз кінәлілер жауапқа тартылсын деп отыр», — деді Айгүл Хәкімжанова.
Қазіргі сот процесінде үш адамға қатысты іс қаралып жатыр.
Қаза тапқан жеті кенші
Естеріңізге сала кетейік, 2025 жылғы 17 ақпанда «Жомарт» кенішіндегі апаттан жеті жұмысшы қаза тапты.
1. Қайрат Ақшалов, 1975 жылы туған — сорғы қондырғыларының машинисі;
2. Ардақ Жақыбаев, 1998 жылы туған — жерасты учаскесінің тау-кен шебері;
3. Бақытбек Жұмадуллаев, 1975 жылы туған — жерасты тау-кен жұмысшысы;
4. Орынбек Кенжебеков, 1991 жылы туған — тиеу-жеткізу машинасының машинисі;
5. Ғалымжан Молдабеков, 1978 жылы туған — шпур бұрғылаушының көмекшісі;
6. Олжас Нұрулдаев, 1979 жылы туған — жерасты учаскесінің энергетигі;
7. Константин Рожков, 1992 жылы туған — жерасты тау-кен жабдықтарының электр слесарь-монтажшысы.
Осы жеті адамның қазасына байланысты қылмыстық істі Жаңаарқа аудандық соты қарап жатыр.
1 қазанда сегізінші сот отырысына келген тараптар соттан істің барлық мән-жайына әділ баға беруді сұрады. Бұл сұраққа түпкілікті жауапты сот шешімі беруі тиіс.
Ulysmedia коллажы
