Қазақстан Азия ойындарының жалпыкомандалық есебінде үш сатыға көтерілді.
Қазақстан құрамасы Жапонияда өткен XX жазғы Азия ойындарын жалпыкомандалық есепте сегізінші орынмен аяқтады, деп хабарлайды ҚР Туризм және спорт министрлігінен.
Ведомствоның мәліметінше, қазақстандық спортшылар 84 медаль — 12 алтын, 24 күміс және 48 қола жүлде жеңіп алды. 2023 жылы Ханчжоуда өткен Азия ойындарында Қазақстан 11-орын алған еді. Осылайша, ұлттық құрама алдыңғы Азиадамен салыстырғанда үш саты жоғарылап, алтын медаль санын арттырды.
Сонымен қатар, Қазақстан құрамасы биылғы Азия ойындарында бірқатар олимпиадалық спорт түрінен ел тарихында бұрын-соңды болмаған нәтижелерге қол жеткізді.
Ойындардың басты қорытындыларының бірі — қазақстандық бокстың 12 жылдық үзілістен кейін Азия ойындарының тұғырының ең биік сатысына қайта оралуы болды. 70 келіге дейінгі салмақ дәрежесінде Төрехан Сабырхан, ал 90 келіден жоғары салмақта құрама капитаны Айбек Оралбай алтын медаль жеңіп алды.
Ерлер арасындағы семсерлесуден шпагашылар құрамасы Азия ойындарының алтынын алғаш рет жеңіп алды. Финалда қазақстандықтар Оңтүстік Корея құрамасын 43:42 есебімен ұтты. Владислав Яковлев пен Иван Чернухин елге академиялық есуден Азия ойындарындағы алғашқы алтынды, ал Тамирлан Тілеулес таеквондодан алғашқы алтынды әкелді.
Велоспортта Алексей Луценко Азия ойындарындағы алтын медальдарының санын алтыға жеткізіп, осы көрсеткіш бойынша ең титулды қазақстандық спортшы атанды. Рината Сұлтанова қазақстандық велошабандоз қыздар арасында алғаш болып жеке жарыста алтын медаль жеңіп алды.
Каратэден Жоламан Бигабыл мен Софья Берульцева екі алтын медаль жеңіп алды. Азия ойындарының бағдарламасына алғаш рет енгізілген аралас жекпе-жек турнирінде Еркінғали Бүркітәлі мен Қадырбек Шынбаев чемпион атанса, Санжар Әділов тағы бір қола медаль иеленді.
Қазақстандық дзюдошылар алғаш рет төрт жекелей финалға шықты. Елдос Сметов, Әбиба Әбужақынова, Әділет Алмат және Ажар Асхат күміс жүлдегер атанды. Құрама аралас командалық турнирде тағы бір күміс медаль жеңіп алды.
Спорттық гимнастикада Милад Карими еркін жаттығуда күміс медаль иеленді. Қазақстан 32 жылдан кейін алғаш рет осы дисциплинада Азия ойындарының жүлдесіне қол жеткізді.
Балуаңдар да оң динамика көрсетті. Еркін күрес шеберлері 2023 жылғы ойындарда жүлдесіз қалғаннан кейін биыл үш қола медаль жеңіп алды. Әйелдер құрамасы Ханчжоудағы бір күміс медальмен салыстырғанда бір күміс және екі қола жүлде иеленді.
Қазақстан марафондық спорттық жүрістен алтын медальдан да айырылды. 42,195 шақырым қашықтықта мәреге бірінші болып жеткен Ясмина Тоқсанбаеваның нәтижесі оның аяқ киім үлгісі World Athletics мақұлдаған тізімде болмағандықтан жойылды. Қазақстанның жеңіл атлетика федерациясы спортшының аяқ киімі жарыс басталғанға дейін тексеріліп, жарысқа жіберілгенін атап өтіп, бұл шешімге наразылық білдірді.
Ведомствоның мәлімдеуінше, жарыс қорытындысы бойынша Туризм және спорт министрлігі федерациялардың Азия ойындарының нәтижелеріне қатысты міндеттемелерді орындауына талдау жүргізеді. Алдыңғы халықаралық жарыстармен салыстырғандағы динамика және нәтижелерге әсер еткен факторлар бағаланады.
«Егер талдау жекелеген спорт түрлері бойынша қолданыстағы даярлық жүйесі күтілген нәтижелерді бермейтінін көрсетсе, тиісті шешімдер қабылданады. Жекелеген федерациялардағы тәсілдерді толық қайта құруға дейінгі шаралар қарастырылады», — деп атап өтті Туризм және спорт министрлігінде.
Сондай-ақ министрлік жауапты ұйымдардың халықаралық аренадағы жұмысын күшейту мәселесін қарастыруды жоспарлап отыр.
https://www.kt.kz/kaz/sports/84_medal_zh_ne_tarihi_zhe_ister_aza_stan_aziya_oyyndaryn_1378001274.html
