2019 жылдан бастап елімізде «Қарапайым заттар экономикасы» бағдарламасы жүзеге асырылуда. Бұл қазақстандықтар күнделікті пайдаланатын тамақ өнімдері мен өнеркәсіптік тауарлардың жергілікті өндірісін дамытуды білдіреді. Бағдарламаның негізгі мақсаты – импортталатын әлеуметтік маңызы бар азық-түлік тауарларын жергілікті өнімдермен алмастыру.
Жоғары сапалы азық-түлік, киім және аяқкиім, жиһаз, керек-жарақтар, тұрмыстық техника ішкі нарықты қанықтырып қана қоймайды, сонымен қатар елімізге қарапайым заттар импортына тәуелділіктен арылып, ұлттық азық-түлік қауіпсіздігін нығайтуға мүмкіндік береді. Қаражат өңдеу өнеркәсібін, ауыл шаруашылығын дамытуға және қолдауға бағытталады. Берілген қаражаттың бағыты инвестициялық мақсатта (құрылыс және монтаж, негізгі құралдар, биологиялық активтер) және айналым қаражатын толықтыруға арналған агроөнеркәсіптік кешенде жұмыс істейтін кәсіпкерлерге несие беру болып табылады. Үкімет қаулысымен OKED қызметінің 65 түрі бойынша несиелендіруге арналған 365 тауардың тізбесі, оның ішінде 69 тамақ өнімдері, 247 азық-түлік емес тауарлар және 49 ауылшаруашылық өнімдерінің түрлері анықталған.
Бағдарламаны әзірлеуге «Даму» кәсіпкерлікті дамыту қоры арқылы 600 миллиард теңге бөлінген. Оның 200 миллиард теңгесі агроөнеркәсіптік кешенді қайта өңдеуге, ал 400 миллиард теңге өңдеу кәсіпорындарына бөлінді. Бағдарлама бойынша мемлекет банктік несие бойынша пайыздық мөлшерлемені субсидиялайды. Қарыздың пайыздық мөлшерлемесі жылдық 15 пайызды құрайды. Субсидиялар мөлшері номиналды пайыздық мөлшерлеменің 9 пайызын құрайды. Субсидиялау мерзімі – 7 жыл.
Ауданымызда бұл бағытта біршама жұмыс атқарылған. «Қарапайым заттар экономикасы» бағдарламасы бойынша 2019 жылы 5 жоба 1 млрд 305 млн теңгеге қаржыландырылды.
Ағымдағы жылы 26,5 млн теңгеге үш жоба ауылшаруашылық кредиттік корпорациясы арқылы мақұлданған. Бір жоба 10,0 млн теңгеге халық банкі арқылы қаржыландырылды.
Аудан әкімдігінің кәсіпкерлік, өнеркәсіп және туризм бөлімі.
