Қазақстанда коронавирустың таралуына жол бермеу жөніндегі ВАК ел өңірлеріндегі эпидемиологиялық ахуалды бағалау матрицасын жария етті. Оған сәйкес, Жамбыл облысы мен Шымкент қаласы «қызыл» аймаққа өтті
3 мамырдағы мәлімет бойынша Жамбыл облысы мен Шымкент қаласынан бөлек, қазір «қызыл» аймақта — Нұр-Сұлтан, Алматы қалалары және Ақмола, Батыс Қазақстан, Қарағанды, Қызылорда, Павлодар облыстары бар. «Сары» аймақта — Алматы, Атырау, Ақтөбе, Шығыс Қазақстан және Маңғыстау өңірлері болса, «жасыл» аймақта — Түркістан, Қостанай, Солтүстік Қазақстан облыстары тұр.
Айта кетейік, Жамбыл облысы коронавирустың таралу көрсеткіші бойынша алғаш рет «қызыл» аймаққа еніп отыр, ал Шымкент қаласы бұған дейін екі рет «қызыл» аймаққа кіріп, кейін «сары» аймаққа ауысқан еді. Жалпы қазір елімізде 44 374 адам коронавирустан емделуде, олардың ішінде 15 476 пациент стационарда, 28 898 науқас амбулаториялық деңгейде ем қабылдауда. 762 адамның жағдайы ауыр, 197 пациенттің жағдайы өте ауыр деп бағалануда.
122 науқас өкпені жасанды желдету аппаратында жатыр. Ал COVID-19 белгілері бар пневмониямен ауырғандарға келсек, 1 мамырдағы мәлімет бойынша аталмыш диагноз 12 адамға қойылып, 2 жағдай өліммен аяқталған. 65 адам дертінен жазылып шыққан.
