Нығматулин министрді ауруханалар мен емханаларды аралауға шақырды
Денсаулық сақтау министрі Алексей Цой Мәжіліс отырысында медициналық қызметтердің қолжетімділігі мен сапасын жақсарту үшін бөлінген қаражаттың қаншалық тиімді пайдаланылғанына қатысты депутаттың сұрағына жауап беріп, халықтың 53,3 пайызының медициналық көмектің сапасына әлі де көңілі толмайтыны туралы статистикаға пікір білдірді.
Денсаулық сақтау министрінің бұл жауабына Мәжіліс спикері Нұрлан Нығматулин де пікір білдіріп, министрді халыққа жақын болуға шақырды.
«Халықпен санитар дәрігердің қаулысы арқылы сөйлесуді доғарыңыз. Ауруханаға, емханаға барыңыз. Әсіресе, аудандық емханаға барыңыз, онда кезекте отырған адамдарды тыңдаңыз. Менің ойымша, сіз осылайша медициналық көмектің сапасы туралы көп нәрсе біле аласыз», — деді Мәжіліс спикері.
Одан бөлек, Мәжіліс төрағасы халықпен байланыс орнататын кез келгенін айтты.
«Қазір Денсаулық сақтау министрлігіне оңай емес екенін түсінеміз. Бірақ халықпен байланыс орнататын уақыт келді. Журналистер қойған сұрақтардың жартысына да жауап бермейсіз. Кім үшін жұмыс істеп жүрсіз? Барып, адамдармен сөйлесіңіз! Ол адамдар бізді сайлайды, ал Парламент сізді тағайындады. Ел басшылығы, Парламент сізді қолдады. Сізге қаражат бөлінді. Жұмыс істейтін уақыт келді», — деді ол.
Еске сала кетейік, Мәжіліс спикері бұған дейін де Денсаулық сақтау министрінің жұмысын сынға алған еді.
