Былтыр әлемді әбігерге салған коронавирус індетінің беті биыл қайта ма деген үміт өкінішке қарай ақталмай тұр. Енгізілген шектеулер мен қабылданып жатқан шараларға қарамастан инфекцияның өсу динамикасы алаңдатарлық күйде. Осыған орай Тараз қаласының әкімі Ержан Жылқыбаев коронавирустың таралуына қарсы күрес жөніндегі қалалық жедел штабтың отырысын өткізді.
Жыл басынан бері коронавирустың — 1385, пневмонияның 752 жағдайы тіркелген. Ең алаңдатарлығы динамикалық даму көрсеткіші күрт өскен, сәуір айында ауырған адамдар саны (КВИ – 681, пневмония – 280) оның алдыңдағы үш айда ауырған адамдар санымен (КВИ – 704, пневмония – 472) шамалас деңгейге жетіп отыр.
Жиында сөз алған облыстық денсаулық сақтау басқармасының бөлім басшысы Лаура Отарбай Таразда КВИ-дің соңғы бір аптада тек 304, ал өткен тәулікте 57 жағдайы тіркелгендігін айтты. Тараз қалалық санитарлық-эпидемиологиялық басқарма басшысының міндетін атқарушы Рита Алтынбасова КВИ жұқтырғандардың дені – зейнеткерлер екен. Бұл дегеніміз той-томалақ, ас сияқты жиын-теріннің тоқтамай тұрғандығының белгісі.
Осы орайда қала әкімінің орынбасары Алмас Садубаев «Мониторингтік топтардың жұмысы туралы» баяндады. Соңғы күндері қоғамдық орындарда карантиндік шараларды сақтамаған азаматтарға қатысты тәртіптік шараның күшейтілгендігін жеткізді. Бұған дейін ескертулер беріліп, тексеру жұмыстары жүргізілген. Ендігі кезекте полицейлердің ықпалымен қатаң шара қолданылып, нысан иелеріне айыппұл салынуда.
Өткен жылдың жаз мезігіліндегі жағдай қайталанбас үшін қазірден әр азамат өзінің және өзгелердің денсаулығын сақтап, айналысындағылардың өмірін сақтауға жауапкершілікпен қарауы қажет.
