1 мамыр – Қазақстан халқының Бірлігі күні қарсаңында қала әкімі Ержан Жылқыбаев этномәдени бірлестіктердің төрағаларымен және белсенді мүшелерімен кездесті.
Мақсат – өңіріміздегі этносаралық мәселелерді талқылай отырып, Мемлекет басшысының жүктеген тапсырмаларын жұмыла орындау, оларды халық арасында насихаттау жұмыстарын бірлесе жүргізу.
«Ынтымағы мен бірлігі жарасқан өңірдің әлеуметтік -экономикалық дамуында этномәдени бірлестіктердің де өзіндік үлесі бар. Сондықтан, туған жеріне шын жанашырлық танытатын өздеріңіз болғандықтан Сіздерді қаладағы игі бастамаларға қолдау білдіріп, шаһардың шырайын ашуға өз үлестеріңізді қосады деген сенімдемін», деді шаһар басшысы.
Кездесуде этномәдени бірлестіктердің төрағалары, облыстық ҚХА мүшелері өз бағыттары бойынша атқарылып жатқан жұмыстарға жан-жақты тоқталып, орамды ойларын ортаға салды. Әлеуметтік жобаларды іске асыруға гранттар беру жолдарын қарастыруды ұсынды.
Кездесуді қорытындылай келе қала әкімі жиналғандарды 1 мамыр – Қазақстан халқының бірлігі күнімен құттықтады. Тараздың өркендеуі жолындағы жұмыстарды алдағы уақытта бірлесе жүзеге асыруға шақырды.
