«Пандемия білім беру үрдісіндегі мұғалімнің баға жетпес рөлін айқындай түсті»: Аймағамбетов жаңа оқу жылымен құттықтады
ҚР білім және ғылым министрі Асхат Аймағамбетов ұстаздар мен оқушыларды жаңа оқу жылының басталуымен құттықтады.
“Сіздерді 1 қыркүйек — жаңа оқу жылының басталуымен құттықтаймын! Білім беру ұйымдарында оқу жылы қатаң санитарлық талаптарды сақтай отырып, дәстүрлі форматта басталады. Балалар өз мектептерін, достары мен сыныптастарын, ал мұғалімдеріміз оқушыларын сағынды. Барлығы мектептердің ашылуын асыға күтті.
Әлемдік пандемия білім беру үрдісіндегі мұғалімнің баға жетпес рөлін айқындай түсті. Атап айтсақ, мұғалімнің кәсібилігі, тәжірибесі, балаға деген сүйіспеншілігі мен оқушының өміріндегі атқаратын рөлі айқындалды. Әлбетте, мұғалімдер гаджет экрандары арқылы емес, балалармен тікелей байланыста бола отырып беретін білімді заманауи технологиялармен салыстыру қиын”, – деп жазды министр Facebook-тегі парақшасында.
Бұған қоса, ол биылғы оқу жылында “Әліппе” қосылатынын атап өтті.
“1 қыркүйек — бірінші сынып оқушылары үшін ерекше мереке. Биыл 394 мыңға жуық бала мектеп табалдырығын алғаш рет аттайды. Осы салтанатты күні «Әліппе» мен «Букварь» оқулықтарын қолдарына алатын бірінші сынып оқушыларын құттықтағым келеді. Бүлдіршіндерімізге мықты денсаулық тілеп, ашық және білімқұмар болуға шақырамын.
Жаңа оқу жылы әрбір оқушы, студент, мұғалім және оқытушы, жалпы білім беру саласына қатысы бар әрбір адам үшін қызықты әрі пайдалы болуын тілеймін”, – деп қосты ол.
Айта кетсек, биыл жаңа оқу жылы дәстүрлі форматта өтеді. Оқушылар мектепке бір жарым жылдан қайта оралады.
