Тәу етер Тәуелсіздігімізге тағы бір тарту ретінде өткен аптаның жұмасында Көктөбе ауылында балалар ойын алаңы ашылды.
Аталған нысанның құрылысын жүргізіп, толық сақтау үшін жергілікті қазынадан 16 миллион теңге көлемінде қаржы қарастырылған.
Дәл сол күні Көктөбе ауылының жеткіншектері Жамбыл көшесінде орналасқан жаңа ойын алаңшасына қарай асықты. Салтанатты шарада ауыл әкімі Медет Рахымбаев пен ауылдық ақсақалдар алқасының төрағасы Бақтыбек Жаманқұлов қызыл лентаны қиды.
Балалар алаңшасының соғылуын ауылдықтар сарыла күткен еді. Әдемі шарлармен әрленген ойын алаңшасына ағыла келген балақайлар шат-шадыман күйде болысты. Ерсілі-қарсылы жүгірген әр жастағы балалар әткеншектер мен сырғанақтарға кезекпе-кезек отырып, қызыққа батты. Жүздері бал-бұл жанған балапандарын көрген ата-аналары да қуанышты күйге бөленді.
-Әмбебап спорттық және балалар ойын алаңының құрылысына 16 миллион қаражат жұмсалды. Десе де, ауылдың ажарын кіргізген алаңда ауылдықтар салауатты өмір салтын ұстанып, бір уақ сергігені кімді де болса қуанышқа бөлейтіні анық,-деді М.Рахымбаев нысанның ашылу салтанатында.
