Тәуелсіздікті тәу етті

Аудандық мәдениет үйінде тәу етер Тәуелсіздігіміздің 30 жылдығына орай дөңгелек үстел өтті. Мерекелік жиынға аудан әкімінің орынбасары Ербол Аймамбетов, “Достық”, “Парасат”, “Құрмет” ордендерінің иегері, ҚР еңбек сіңірген қайраткері, Қазақ ұлттық өнер университетінің профессоры, күйші-сазгер Әбдімомын Желдібаев, аудан әкімдігі мәдениет және тілдерді дамыту бөлімінің басшысы Әсел Жазықбаева, аудан әкімдігі ішкі саясат бөлімінің басшысы Айнұр Рахымбаева, түрік ұлтының өкілі Н.Салаков және арнайы шақырылған Тәуелсіздік құрдастары мен мәдениет саласының қызметкерлері қатысты.
Дөңгелек үстелге қатысушылар ел бағына айналған егемендік тарихынан сыр шертісті. Ербол Еркінұлы өз сөзінде Тәуелсіздік алған кезеңнен бастап, күні бүгінге дейін еліміз мемлекет үшін ең маңызды ұлтаралық татулықты, конфессияаралық келісімді, өзара түсіністік пен тұрақтылықты, достықты өзіндік ұстаным етіп өмір сүріп келе жатқанын тілге тиек етті. Мұның барлығы жағдайды тез бағдарлап үлгерген Елбасымыз Нұрсұлтан Назарбаевтың ұзақ жылдарға арналған стратегиялық саясатының арқасында екендігін атап өтті. Ал, Ә.Желдібаев Нұрсұлтан Назарбаевтың ел тарихындағы тағы бір нық қадамын ерекше әсермен еске алып, яғни ауыр экономикалық дағдарыс кезеңінде маңызды шешім қабылдап, ядролық қарудан бас тартқанын-нағыз көрегендік деп білетінін жеткізді. “Бұл шын мәнінде қазақстандықтар үшін емес, бүкіл жер шары үшін тарихи оқиға әрі өзге елдерге үлгі болды” деді өз сөзінде.
-Абыройы асып, мерейі тасыған мемлекетіміздің әр қадамында Елбасымыз Нұрсұлтан Назарбаевтың еңбегі ерен. Тұңғыш Президентіміздің сара жолын жалғастырып, елді ұлы мақсаттарға ұйыту ісінде тізгінді тарта ұстаған Қасым-Жомарт Тоқаевтың да даналығымен дараланатынымызға сенімім мол,-деді адуынды ақсақал.
Дөңгелек үстел барысында Н.Салаков, Сауытбек ауылдық мәдениет үйінің меңгерушісі Г.Қасенова, аудан әкімінің баспасөз хатшысы М.Атайбековтер де тәуелсіздік турасында тебірене сөз сөйлеп, өткен тарихымыздың өткелдерінен ой бөлісті. Бұған қоса жас айтыскер Айым Көшербай да өз өнерін паш етті. Жиын соңында дөңгелек үстелге қатысушылар Тәуелсіздік тарихынан сыр шертетін кітаптар көрмесін тамашалады.