Қазіргі уақытта аудандағы 18 ауылдық округ әкімі аппараттары «Ашық әкімдік» фронт кеңсесінің форматында жұмыс жасауда.
2019 жылдың сәуір айында Шу қаласында «Сервистік әкімдік» ашылған болатын. Ағымдағы жылдың маусымында Шу ауданы әкімі аппараты ғимаратынан заманауи үлгіде жабдықталған «Сервистік әкімдік» кеңсесі іске қосылып, аудан орталығы тұрғындарына қажетті қызметтерді (жұмыспен қамту, әлеуметтік жәрдемақылар тағайындау, АХАЖ қызметі т.б.) бір жерден алу мүмкіндігі ашылды.
Сонымен қатар, Дулат, Қонаев, Ескі-Шу, Жаңақоғам ауылдық округ әкімі аппараттарынан «Сервистік әкімдік» ашуға қаржы бөлініп, бүгінгі күнге құрылыс-монтаждау жұмыстары жүргізілуде. Бұдан бөлек ауданда өзіне-өзі қызмет көрсетуге арналған 79 бұрыш бар. Оның ішінде 47-і мектептерде, 12-і кітапханаларда, 20-ы аудандық және ауылдық округ әкімі аппараттарының ғимараттарында орналасқан. Өзіне-өзі қызмет көрсету бұрыштары арқылы тұрғындарға электронды қызметтерді кез келген уақытта алуға мүмкіндік бар.
Ағымдағы жылға «Сыбайлас жемқорлықтың алдын алу» бағытында Мемлекеттік әлеуметтік тапсырысқа жергілікті бюджет есебінен 800 мың теңге қарастырылып, үкіметтік емес ұйымдармен бірлескен іс-шаралар жүргізілуде. Аудан әкімдігіне қарасты барлық мекемелердің 2021-2023 жылдарға арналған бюджеттері «Ашық бюджеттердің интерактивті картасы» жобасы аясында интерактивті картаға орналастырылды. Бір сөзбен айтқанда ауданда сыбайлас жемқорлықтың алдын алу, сыбайлас жемқорлыққа қарсы мәдениет қалыптасыру жұмыстары тұрақты жүргізілуде.
