Жүсіп Баласағұни атындағы орта мектеп кітапханасында Отбасы күні қарсаңында «Ауылыма кітап» акциясы ұйымдастырылды. Акцияның мақсаты — жас ұрпаққа оқу мәдениетін насихаттау және ауыл мектептерінің кітапхана қорын кеңейту арқылы жоғарғы рухани – адамгершілікті қалыптастыру. Ұлттық классикалық шығармаларды оқи отырып, өз халқымыздың мәдениетін, дәстүрін үйрену және үлгі тұтарлықтай тұлғаларды оқи отырып, олардан үлгі алу.
Отбасы күні қарсаңында «Ауылыма кітап» қайырымдылық акциясында Тілеужановтар және Шимашевалар отбасы іс-шараға атсалыса отырып, мектеп кітапханасына балалар терең білім алып, үлгі аларлықтай кітаптар сыйға тартты. Қарт жауынгер Тілеужанов Әшімқұл атамыздың «Өткірдің жүзі» атты кітабын, келіні зейнеткер ұстаз Клара Абдуллақызы сыйлады. Зейнеткер ағамыз Шимашев Нұрым және жұбайы зейнеткер ұстаз Дәулетқұлова Айгүл, ағаның қарындасы Рахат Сейдахметқызы Шимашеваның аналары туралы жазған «Өнеге тұтқан өмір» атты тамаша он екі дана кітабын сыйлады.
Осы акцияны қолдап, мектебіміздің кітапханасына келіп, кітаптар сыйлаған Тілеужановтар отбасымен Шимашевалар отбасына алғысымыз шексіз. Ауылдағы балалар пайдалы және қызықты әдебиеттерге қол жеткізіп, ерте жастан бастап өзекті оқу материалдарын зерделеп қана қоймай, көркем шығармалардың көмегімен жоғарғы моральдық және рухани – өнегелік қасиеттерін дамытады.
Д.ҚАСЫМОВА,
мектептің кітапханашысы.
