Тәуелсіздігіміздің 30 жылдық мерейтойына орай еліміздің түкпір-түкпірінде тамаша тартулар легі толастар емес. Соның бір жарқын дәлелі, Қарттар күні қарсаңында Төле би ауылында жаңа балабақша кішкене бүлдіршіндерге есігін айқара ашты. “Жангүлім” балабақшасының ашылу салтанатына Төле би ауылының әкімі Азамат Ошанов, аудандық ардагерлер кеңесінің төрағасы Доғдырхан Байбатшаев, “Нағыз патриоттар” қоғамдық бірлестігінің жетекшісі, “Мар-Нұр компаниясы” ЖШС директоры Ғалия Әбітаева арнайы қатысты.
Балабақшаға бас сұққаннан-ақ қонақтар шат-шадыман күйге енді. Төңіректің барлығы әсем безендірілген, айналаның барлығы қызылды-жасылды шарларға толы, арнайы әзірленген фуршет. Бұған қоса түрлі мультфильм кейіпкерлерінің костюмдерін киген балабақша қызметкерлері балақайлардың көңілдерін аулады. Арнайы шақырылған қонақтар да ізгі тілектерін жаудырды.
-Ел егемендігінің елеулі жылында ел игілігіне арналған еңселі балабақша ашып отырған жеке кәсіпкер Гүлмира Ермекованың еңбегі зор. Неге десеңіз, елді дүрліктірген пандемия кезеңіндегі қиындықтарға қарамастан жан-жақты жасақталған жаңа балабақша ашу-екінің бірінің қолынан келе бермейтін іс. Алдағы уақытта Гүлмира Диханбайқызы 25 адамды жұмыспен қамтымақ. “Жангүлім” бөбекжай балабақшасының Мұхтар Әуезов мектебінің дәл іргесінен орын тебуі де көпшілік үшін қолайлы екені айтпаса да түсінікті. Балалардың игілігіне болысар бастамаларыңыз берекелі болсын,-деді Төле би ауылының әкімі Азамат Серікұлы.
Қазақи нақышта киінген әжелер тәттіден шашу шашып, ақсақалдар балабақшаның лентасын қиғаннан кейін жиналған қонақтар сән-салтанаты келіскен, заманауи балабақшаның ішін шолып шықты. Бұған қоса, кішкене бүлдіршіндердің концерттік бағдарламасын тамашалады.
