Мемлекеттік қызметшілердің сыбайлас жемқорлық қылмыстары мен осы сипаттағы құқық бұзушылықтарға бой алдыруының себебі көп. Оған ең алдымен қызметшілердің білім деңгейінің, әдептілік ұстанымының төмен болуы әсер ететін болса керек. Кей мемлекеттік қызметшілердің құқық бұзушылыққа немқұрайдылық танытуы, кәсіби әдептілігінің жетіспеуі де, жеке басының қамын ойлауы да парақорлықтың дендеуіне септігін тигізуде. Сондай-ақ кейбір мемлекеттік орган басшыларының сыбайлас жемқорлыққа қарсы заң талаптарын атқаруда ынта танытпай, жұмыс жүргізбеуі де жемқорлықтың тамырын тереңдете түседі. Әрине, сыбайлас жемқорлық дәрі беріп емдейтін сырқат емес.
Айналасындағы салауатты, таза және сау ортаны шарпып, тыныс-тіршілігін тарылтатын, заңсыз әрекеттермен қоғамдық ортаның және мемлекеттік органдардың, ұйымдардың, дара кәсіпкерлердің, азаматтардың қызмет етуіне қатер төндіретін қауіпті дертті болдырмаудың тетігі халықтың өзінде.Осыған байланысты қазіргі таңда қоғамымызға қауіп төндіріп, орасан кесел келтіретін осынау келеңсіз әлеуметтік құбылысқа қарсы шаралар қатаң қолға алынып жатыр.
Елдің ертеңі үшін, болашақ келер ұрпақ алдында еңсеміздің тік көтеріліп жүруі үшін, жемқорлық індетімен белсене күресіп, түп-тамырын жою қажет. Қоғамның барлық күш-жігерін біріктіріп, осы дерттің одан әрі ушықпауы үшін оны тоқтатудың барлық амалдарын қолдану арқылы ғана бұл құбылысқа қарсы тұруға болады. Осындай келеңсіз құбылыстармен күрес жүргізу тек сот, құқық қорғау немесе мемлекеттік органдардың міндеті ғана емес, бұл барлық ұлтжанды азаматтардың парызы.
Қазіргі кезде қолданыста жүрген «Сыбайлас жемқорлыққа қарсы іс-қимыл туралы» Заңы мемлекет тарапынан сыбайлас жемқорлықтың алдын алу мен оны болдырмау жөнінде нақты шараларды жүзеге асырады. Атап айтсақ, Қазақстан Республикасының 2015-2025 жылдарға арналған сыбайлас жемқорлыққа қарсы стратегиясы және көлеңкелі экономикаға қарсы іс-қимыл жөніндегі маңызды құжат болып табылады. Сонымен қатар сыбайлас жемқорлықпен пәрменді күресу үшін халықтың құқықтық сауатсыздығын жоятын, құқықты түсіндіру жұмысының деңгейі мен сапасын арттырудың маңызы зор. Халық өздерінің құқықтарын, өздеріне қарсы қандай да бір құқыққа қайшы іс-әрекет жасалған жағдайда қандай іс-қимыл қолдану керектігін толық білулері тиіс. Біздің қоғамда сыбайлас жемқорлыққа жол жоқ. ҚР АШМ АӨК мемлекеттік инспекция комитетінің Шу аудандық инспекциясы, өз құзыреті шегінде, мемлекеттік органдардың, ұйымдардың, лауазымды адамдар мен азаматтардың жұмысында ҚР заңдылық режим үстемдігін қолдайтын, мемлекеттік заңды мүдделерін қорғайтын мемлекеттік бақылау
және қадағалау жүйесінде маңызды рөл атқарады.
Жүргізілетін іс-шараларды тиімді ету мақсатында жыл сайын инспекцияда сыбайлас жемқорлыққа көріністерін шектеуге бағытталған іс-шаралар жоспары әзірленеді және жүзеге асырылады, сондай-ақ тұрақты түрде сенім телефоны жұмыс істейді. Сыбайлас жемқорлықпен күресу ымырасыз, тоқтаусыз және барынша қатал түрде жүргізілуі тиіс.Сыбайлас жемқорлықпен күрес бірдің емес көптің белсене атсалысатын ісі.
Ж.НУРСЕИТОВ,
ҚР АШМ АӨК МИК Шу аудандық
аумақтық инспекция басшысы.
