Өткен аптада облыс әкімінің орынбасары Рүстем Дәулет ауданымызға келіп, жылыту маусымының жайын білмек үшін коммуналдық қызмет саласының жұмыс барысымен танысты.
Бірінші кезекте Рүстем Рысбайұлы танысу жұмысын қаланың көппәтерлі тұрғын үйлері мен әлеуметтік нысандарға жылу тарататын «Шу-жылу» жауапкершілігі шектеулі серіктестігіне барудан бастады. Серіктестік басшысы Руслан Көккөзовтың айтуынша, «Батыс» тұрғын алқабының бірқатар тұрғын үйлерінде негізгі жылу құбырының ақауы, үйішілік жылу жүйесінің тозуы сынды мәселелер бар. Дегенмен мектептерде, балабақшаларда, ауруханалар мен емханаларда күн суыта салысымен жылу берілген. Тұрғын үйлердегі жағдайды түзетуге келсек, пәтер иелерінің бірлестігі бұған көңіл бөлгендері ләзім.
Серіктестіктің өзінде мәселелер аз емес, соның бастысы — қазандықтың құбыры апатты жағдайда. «Бөлек блоктардан жиналған әрі мерзімі аяқталғаннан кейін оны қайта жөндеу мүмкін емес, сондықтан жаңасын салу қажет»,-деді Руслан Көккөзов.
-Құрылыстың жобасын әзірлеу қажет, сонан соң біз қаржы бөлу мәселесін қарастыратын боламыз,-деген Р.Дәулет аудан әкімінің орынбасары Серік Сәрсенбековке тапсырма жүктеді. Сондай-ақ облыс әкімінің орынбасары көгілдір отын беруде кедергілер болған жағдайда қажетті қатты отын қорының бар екендігіне көз жеткізді.
Бұдан кейін Рүстем Рысбайұлы Ы.Алтынсарин атындағы мектепке бағыт алып, өткен жылғы мамыр айында басталған жапсарлас нысан мен спорт зал құрылысының барысын көзбен көрді. Құрылыстың қарқынына көңілі көншімеген облыс әкімінің орынбасары жыл соңына дейін пайдалануға беріледі деген мердігердің сөзіне күмән келтірді.
-Күн райына байланысты жұмысты үдету керек. Нысанды беру мерзімін кешіктірген жағдайда мердігер компания, яғни «Азамат құрылыс» ЖШС басшылығы тиісті жауапкершілікке тартылатын болады,-деді Р.Дәулет.
Сондай-ақ, облыс әкімінің орынбасары аудандық орталық аурухананың қысқы маусымға әзірлігін тексеріп, аудан орталығындағы әл-Фараби атындағы мектептің жаңа ғимаратының құрылысын да шолып шықты. Құрылысқа жауапты «Сұңқар 2002» ЖШС-нің құрылыс-монтаж жұмыстарының қарқынына қатысты өткір сындар айтып, ескертулер жасады.
-Жоспарланған оқу корпусының үш қабатынан тек төменгі қабаты салынған.
Техника жеткіліксіз. Бұл істің барысын баяулататыны даусыз. Сондықтан басшылықтарыңыз осы сұрақ төңірегінде ойлануы тиіс. Әсіресе, жарты жылдан соң бұл нысан ел игілігіне берілуі керектігін әсте ұмытпағандарыңыз жөн,-деді Рүстем Рысбайұлы.
Сапар соңында Р.Дәулет аудан әкімі аппаратының мәжіліс залында аймақтық штабтың көшпелі отырысын өткізді. Жиында Шу, Мойынқұм, Қордай аудандарындағы әлеуметтік нысандардың жылыту маусымына дайындығы туралы айтылды. Отырысқа аталған аудан басшылары Н.Календеров, Ә.Балқыбеков, М.Мұсаев, мекеме және кәсіпорын басшылары, Шу ауданының ауылдық округ әкімдері қатысты.
Кеңейтілген кеңес барысында облыс әкімдігінің осы салаға жауапты басқарма басшылары баяндама жасап, нысандардың жай-күйіне егжей-тегжейлі талдау жасады.
Басқосу мәресінде Рүстем Рысбайұлы барлық күшті алдағы жылыту маусымының қауіпсіз әрі үзіліссіз өтуіне салу қажеттігін атап өтіп, аудан басшыларына барынша сақ болуды тапсырды.
