Елімізде қазан айының үшінші жексенбісі орман шаруашылығы қызметкерлерінің кәсіби мерекесі ретінде аталып өтуде. Табиғаттың ажырамас бөлшегінің бірі орман болса, бірі жан-жануарлар. Осы екі бөлшекті қорғап, сақтап, молайтуға мол үлес қосып жүрген орман шаруашылығы қызметкерлері біздің өңірде де бар. Күре жолдың бойындағы «Қосқұдық ормандарды және жануарлар дүниесін қорғау жөніндегі коммуналдық мемлекеттік мекемесін көбіміз сыртына қарап шағын ұжым деп ойлап қалатынымыз анық. Алайда Жақыпов Әділ Қожабекұлы басқаратын бұл мекемеде 60-тан астам қызметкер жұмыс істейді.
Осы мекеменің қарамағындағы орман қорының көлемі 416 мың 484 гектарды құраса, оның ішінде 196 мың 744 гектары Мойынқұм ауданының аумағында болса 219 мың 744 гектары Шу өңірінің аумағына тиесілі. Сонымен қатар Алабота және Қосқұдық орманшылығы деп аталатын екі бөлініс бар. Орманды күзету, орманды өсірумен шұғылданатын аталмыш мекеме көктем және күз айларында құмды аймаққа сексеуілді отырғызу, дәнін себу жұмыстарын жүргізеді. Яғни көктемде сексеуіл көшеті отырғызылса, күзде сексеуілдің тұқымы себіледі. Жыл сайын 1,5 мың гектар алқапқа сексеуіл тұқымдары өсіріледі екен.
Әділ Қожабекұлының айтуынша, биылғы жылы орман қорында өрт орын алған жоқ. Табанды түрде тер төккен әріптестердің еңбегін жоғары бағалаймын. Орманның басты жауы өрт пен броконьерлер екені даусыз. Кейінгісін бақылауға болады, ал өрттің тілсіз жау екені әубастан белгілі. Оның кесірінен қатты ағаштар жойылып, құм көшу қаупі күшейді. Десе де, заңсыз аң аулағаны, өрт қауіпсіздігін сақтамағаны үшін орман заңдылығын бұзған 21 тұлғаға хаттама толтырылған көрінеді. Бір сексеуілдің өсіп- өнуіне жігіттің жасындай уақыт керек болса, оның өзі 4 тоннаға дейін құмды тоқтатуға қауқарлы дейді мамандар.
17 орман қорықшысы, 3 орман шебері, 2 орманшылық басшысы, 17 штат өрт сөндіруші болса, жүргізушілер, тракторшылар тағы да басқа мамандар қауіпке толы жұмысты жауапкершілікпен атқарып жүр. Қауіпті екенін бұрнағы жылы қаза тапқан қорықшы ісінен кейін анық аңғардық. Өрт сөндіруге арналған 2 техника, 9 трактор, 11 жол таңдамайтын көліктер, соқалар тәуліктің кез келген сәтінде қауіпті сейілтуге даяр. Айта кетерлігі, апта бұрын осы мекемеге жаңа трактор, ағаш отырғызатын, тұқым себетін машинкалар беріліп, материалдық-техникалық база 70 пайызға жетіп отыр. Біріккен Ұлттар Ұйымы тарапынан, дүниежүзілік банктерден де қажетті қолдау болады деген хабар келуде.Олардың игі мақсаты табиғаттың жақсаруына жағдай жасау екені ақиқат.
Қазіргі таңдағы мәселелердің бірі техника тапшылығы болатын. Ол шетінен шешіліп, түгенделді. Ендігісі мамандардың тапшылығы. Осы сала жас мамандарының мекеме есігінен ене сала сұрайтыны — жалақы. Жалақының көлемін ести сала, бірден бас тартып жатады. Десе де қазіргі кезде ұжымның 60 пайызын жастар құрайды,-дейді мекеме директоры. Әкеден балаға жалғасып жатқан орманшылық кәсібін меңгергендер де жоқ емес, мақтан тұтатын аға буын ардагерлеріміз де бар. Күн-түн демей орманды күзетіп, өрттен қорғап, жануарларды бақылайтын қызметкерлеріне басшылары дән риза. Мамандығына деген махаббаттары бар жандар мардымсыз жалақы алса да жұмыстарына адал.
Сонымен қатар Әділ Қожабекұлы Мемлекет басшысы Қ.Тоқаевтың өткен жылғы Жолдауында берілген тапсырмаларды жүзеге асыру бойынша жұмыстарды атап өтті.
-Қасым-Жомарт Кемелұлы ел аумағында 2025 жылға дейін 2 миллиард ағаш отырғызу туралы тапсырма берген болатын. 5 жыл ішінде Жамбыл облысы 140 миллион түп ағаш отырғызу керек. Ол жұмыстар биыл басталды. Көктем кезінде 628 гектарға сексеуіл көшетін отырғыздық, 1 гектарға 1800 түптен айналады. Күзде тұқым себеміз, оның нәтижесі келесі жылы белгілі болмақ,-дейді ауданымыздың бас орман қорықшысы. Естігенімізге сенсек, көшеттер әуелі уақытша тәлімбақта өсіріледі. Әзірше тұрақты тәлімбақ жоқ. Биылғы сепкен тұқым 2023 жылдың көктемінде дайын болады. Орман өсірушілер сексеуілден өзге ағаш отырғызбайды. Өйткені бұл ағаш күтімді қажет етпейді, сусыз тамыр жайып, бойын тіктей береді. Тек қана күтіп-баптау жұмыстары жүргізіледі. Шөбі қалың өссе оталады. Құмның сүйікті ағашы да осы сексеуіл екен.
«Орман — ел дәулеті, жер сәулеті» деген мақал тегін айтылмаған. Орманымыз көп болса — олжамыз да көп болмақ. Осы салада аянбай еңбек етіп жүрген жандарды, сала ардагерлерін кәсіби мерекелерімен құттықтап, толағай табыс тілейміз. Тас шайнап, құм түкірмес үшін табиғатты аялап, оның тамыры іспеттес сексеуіл ағашын сындырмайық, аңын аулап ада қалмайық ағайын!
