Бейбіт заманның да өз батырлары бар. Кез келген оқыс оқиға, төтенше жағдайға қарамастан өз өмірін тәуекелге тігетін, тосыннан келген апатта бірінші болып көмекке ұмтылып, жауаптылық танытатын құтқарушылар, төтенше жағдай қызметкерлері қандай құрметке де лайықты. Апта басында аудан әкімдігінің мәжіліс залында Құтқарушылар күніне орай салтанатты жиын өтті.
Оған аудан әкімі Нұржан Календеров, аудан әкімінің орынбасары Нұрлан Жақсыбаев, аудандық мәслихат хатшысы Жасұлан Әбенов, “Nur Otan” партиясы аудандық филиалы төрағасының бірінші орынбасары Болатхан Ниязбеков және кәсіби мереке иелері қатысты.
-Жауапты әрі қауіпті мамандық иелері сіздерді кәсіби мерекелеріңізбен құттықтаймын!. Апат айтып келмейді. Тосыннан болған апат кезінде азаматтарға бірінші болып көмекке ұмтылатын әрі алдыңғы шептен табылатын да өздеріңіз! Әрқашанда қызметтеріңізде қайсарлық танытып, кез келген төтенше жағдайда қасқайып қарсы тұра беріңіздер! Сіздердің дендеріңізге саулық, отбасыларыңызға амандық тілеймін!,-деді құттықтау сөзінде Нұржан Сәбитұлы.
Мерекелік жиын соңында құтқарушылар аудан әкімінің Құрмет грамотасымен және Алғыс хатымен марапатталды. Сондай-ақ аудандық мәслихат хатшысы Жасұлан Әбенов бірқатар азаматтарға Шу ауданының Құрмет грамотасын табыстады.
