Әдебиет абызы саналатын Әбіш Кекілбаевтан «Адамды адам еткен -кітап, адамзат еткен -кітапхана» деген дестелі ой қалған екен. Расында көпшілігіміз дүкен аралап, мейрамханаларға барып, шетелге шығып жатқанымызбен қойнауы қазынаға толы кітапханаға бара бермейтініміз ақиқат. Десе де заңғар жазушы Мұхтар Әуезовтың «Кітап аяулы досы бола бастаған шақтан былай ғана әрбір жан өзін интеллигент бола бастадым деп санауына болады»,-деген сөзін қаперіне тоқыған тұрақты оқырмандар таусылып қалған жоқ.
Бүгінде кітап оқуды насихаттап, оның ішкі әлемін паш ететін іс-шаралар ұйымдастыру жұмысы жолға қойылып келеді. Жуырда Қорағаты ауылдық округі Мойынқұм ауылында Ш.Уәлиханов атындағы облыстық әмбебап ғылыми кітапханасының ұйымдастыруымен «Ең үздік ауылдық кітапхана-2021» байқауы өткен болатын. Бұл шара Тәуелсіздіктің 30 жылдығына орай өткізіліп жатқанын атап өткен жөн.
Бұл байқауға Мойынқұм ауылдық кітапханасы қатысып, облыстан келген аталған кітапхана директоры Э.Е.Абдинова мен оның орынбасары М.З.Жеңсікбаеваның алдында өз өнерлерін көрсетті. Ауылдық мектеп ғимаратында өткен шарада аудан әкімдігінің мәдениет және тілдерді дамыту бөлімінің басшысы Ә.Жазықбаева, округ әкімі Ә.Диханбаев, мектеп директоры Ғ.Жанпейісов қатысып, талантты оқырмандардың өнерлерімен танысты.
Іс-шара «Шашу» биімен ашылып, Ербосын Қасымбектің патриоттық әндерді орындауымен жалғасты. Раздықтың күйі «Салкүреңді» нақышына келіп орындаған кітапханашылар көпшілікті тәнті етті. Назерке Бодаубек «Тәуелсіз қазақтың қызымын» деп ән салса, Сәкен Рамазан «Алға, Қазақстан» әнімен көрерменді рухтандырды. Жергілікті мектеп оқушылары да отты өлең жолдарын оқып, Тәуелсіздік туралы толғанды. Кейін көрермендерге 175 жылдығы өтіп жатқан Жамбыл Жабаевқа арналған кинотуындыдан үзінді көрсетілсе, аталған ауыл кітапханашысы Зүлфия Сауранбаева «Тәуелсіздік-Тәңірден келген тәтті сый» тақырыбымен кітап көрмесін таныстырды.
Шара мәресінде Әсел Сәрсенқұлқызы сахнаға көтеріліп, байқау туралы бірер сөз қозғап, кітапханашылардың еңбегіне ризашылығын білдірді. Сондай-ақ осы шараның белсенділеріне Алғыс хатын тапсырып, ақ тілегін білдірді. Расында кітапхана қызметкерлері әмбебап жандар. Әнге әуестік танытып, биге икем білдіріп, әртістік қабілеттерін де байқатып келеді. Өткізген өнегелі шараларын әлеуметтік желі арқылы жариялап отырады. Үкілеп қосқан үміттері ақталып, облыстық байқауда жерлестерімізге жеңіс тілейміз.
