«Атадан бота қалғанша, бата қалсын» деген бір ауыз сөзге тоқтаған халықтың ұрпағымыз. Аузы дуалы, сөзі уәлі, көпті көрген, көп жасаған жандардан бата алу дәстүріміз де бұрыннан бар. Бүгінде білекті көтеріп бата сұрағанда жадағай тост айтып, дүйім жұртты ду күлдіріп жүрген қариялар да аз емес. Осы олқылықтың орнын толтыру мақсатында ұлтымыздың байырғы тұрмыс-салтымен берік ұштасқан, бүгінгі буынға бағыт-бағдар сілтейтін сөлді сөзбен бата беру жарысы жолға қойылған болатын. Бұрнағы жылдары бастау алған байқау жуырда ғана Қордай ауданы Әлжан ана ауылында өтті.
Жамбыл облыстық ардагерлер кеңесі ел Тәуелсіздігінің 30 жылдығына арнап «Батаменен ел көгерер» атты республикалық байқаудың іріктеу кезеңін ұтымды ұйымдастырғанын атап өту керек. Оған облысымыздың әр ауданынан және Тараз қаласынан келген 13 қария қатысып, үш кезең бойынша бақ сынасты. Батагөйлер арасында біздің жерлесіміз де бар. Ақсу ауылдық округі, Оразалы батыр ауылының ардагерлер алқасының төрағасы, облыстың «Құрметті ардагері» Жайлаубек Қалиев батагөйлер байқауына қатысып қана қоймай, бас жүлдені жеңіп алғанын сүйіншілей хабарлаймыз.
Осыған байланысты, аудан әкімі Нұржан Календеров ақсақалды арнайы қабылдап, сый-сияпат көрсетті. Бір айта кетерлігі, бұған дейін Талас ауданынан келген ақсақал 30 бата жаттап, облысымыздың жеңімпазы болған екен. Ал биылғы байқауда Жайлаубек ақсақал 37 батамен басым түсіп, бас жүлдеге ие болып отыр. Басы дұға, бойы ғибрат, аяғы тілек, қалыбы тәрбие саналатын бата беру байқауында ауданымыздың намысын абыроймен қорғап, қарсыластарынан оқ бойы озық шыққан Жайлаубек Қалиевке аудан басшысы қазақы дәстүрмен иығына шапан жауып, құрмет көрсетті. Сонымен бірге қараша айында Атырау облысында өтетін «Батаменен ел көгерер» атты республикалық байқауда жеңіске жетуіне тілектестік білдірді.
