ҚР Тәуелсіздігінің 30 жылдығына орай Орталық алаңда спорттық іс-шаралар ұйымдастырылды. Жарыс қол күресі, гір тасын көтеру, арқан тарту және қошқар көтеру түрлерінен өткізілді.
Іс-шараны Жуалы аудандық «Бұқаралық спорттық іс-шаралар өткізу орталығы» директоры Жандос Баетов ашып, құттықтау сөз сөйледі.
Спорттық сайыс қызықты әрі тартысты өтті.Арқан тартудан жарыс командалық және олимпиадалық жүйеде өтті. Яғни жеңіліс тапқан команда жарыс жолынан шығып отырды. Арқан тартуға 9 команда қатысып, тартысты бәсекеде 1 орынды «Күреңбел ауылдық округі» командасы иеленді. 2 орынды «Б.Момышұлы ауылы» командасы жеңіп алса, 3 орын «Ақсай ауылдық округі» командасына бұйырды.
Қол күресінен жасөспірімдер арасында 1 орынды Нұралхан Әмірхан, 2 орынды Қасым-Жомарт Тұрарбек, 3 орынды Шерхан Кәдірше жеңіп алды. Қол күресінен ересектер арасында 1 орынды Бақытжан Сәрсенбекұлы, 2 орынды Фархат Лес, 3 орынды Данияр Бекешов иеленді.Гир тасын көтеруден жасөспірімдер арасында 1 орынды Аман Диас, 2 орынды Әмірхан Нұралхан, 3 орынды Жарас Қуанышбекұлы жеңіп алды. Гир тасын көтеруден ересектер арасында 1 орынды Артықов Асхат, 2 орынды Абдрашев Бекұлан, 3 орынды Әуесхан Әбдімомынов иеленді.Қошқар көтеруден жарысқа салмағы 60 келіден асатын қошқар тігілген болатын. Сайысқа 15 спортшы қатысты. Сайыс ережесі бойынша қошқарды иыққа салған азамат бір орында отырып-тұрып мойындағы жүгін барынша көбірек көтеру керек. Қошқар сол жеңімпаздың жетегінде кетеді. Жарыс нәтижесі бойынша Қарасаз ауылынан келген Жеңіс Қалдыбек қошқарды 120 рет көтеріп, жарыс жеңімпазы атанды.
Жарыс қорытындысы бойынша жеңімпаздарға диплом, медаль және жарыстың демеушісі болған Жамбыл облыстық мәслихатының депутаты Әлімбек Жұмабаев тарапынан қаржылай сыйлықтар табыс етілді.
