Қостанай облысының Әулиекөл ауданында Құсмұрын ауылын электр жарығымен қамтамасыз етіп отырған қосалқы стансада өрт болды, деп хабарлайды http://shanyraqinfo.kz Stan.kz ақпарат агенттігіне сілтеме жасап…
Бұл жайында облыстың Төтенше жағдайлар министрлігінің баспасөз қызметі мәлімдеді.
Таңертеңнен бастап оқиға орнында төтенше жағдайлар және коммуналдық қызметтердің қатысуымен облыс әкімінің орынбасары жетекшілік ететін жедел штаб құрылды. Өрт 70 шаршы метр аумақты шарпыған. Трансформатордың майы өртенген.
Өртті сөндіруге алты техника жұмылдырылды: құм толтырылған пойыз, екі өрт сөндіру пойызы және басқа да өрт сөндіру техникасы, сондай-ақ жеке құрамның 40 адамы өртті ауыздықтауға көмектескен.
«Қарасу және Науырзым аудандарының электр желілерін қайта қосу арқылы ауылды электрмен қамту жартылай қалпына келтірілді. Өңірде электрмен қамту жұмыстары әлі де жалғасуда», – делінген аудан әкімдігінің мәлімдемесінде.
Өрт сағат 12:49-да сөндірілді.
