Мақпал Жүнісова «Ирина Қайратовнаны» сотқа бермек
instagram.com/zhunusova.makpal/ / «Отыздан асып барамын» фильмінен кадр
“Отыздан асып барамын» фильмін түсірген “Ирина Қайратовна” тобы халық артисі Мақпал Жүнісованы ренжітіп қойды.
Қазақстанның халық артисі Мақпал Жүнісова «Отыздан асып барамын» атты Қазақстан Тәуелсіздігінің 30 жылдығына арналған фильм түсірген шығармашылық тобына қатысты базынасын айтты, деп хабарлайды Шаңырақ инфо Экспресс К. сайтына сілтеме жасап…
«Отыздан асып барамын» деген бір фильм шығыпты. Бұл туралы кеше ғана естідім. Маған бір кісілер сілтемесін жіберді. Кинода менің рөлімді ойнап жүрген, маған ұқсамайтын кейіпкер бар екен,
Ол «біріншіден, мені ешкім киноға шақырған жоқ. Екіншіден, алдымнан ешкім өткен жоқ. Үшіншіден, мен әлі тірімін» деп айтты.
Әншінің айтуынша, кинодағы «Өмірдің көбі кетіп, азы қалды» деген әнді Мақпалдың дауысымен берген. Бірақ оның дауысымен басқа қызға айтқызып қойған.
«Ол қыз фонограммамен ұрып тұр. Менің алдымнан өтпеген ол да ұятсыз екен. «Апам әлі тірі, неге өзі айтпайды» деп неге ойланбайды? Сондықтан соттасып жүретін уақытым жоқ. Бірақ ол кинода ойнаған мен емес. Семейден хабарласып, сізге ұқсамайды деп жатыр. Домбыраны жерге сүйретіп жүрген емеспін. Не болса да бұлар менің жауларым деп ойлаймын. Мені жаман қылып көрсеткісі келген. Кім түсірсе де бұл дұрыс емес, мен әлі жер бетінде бармын. Сенбеңіздер, ол жерде мен емес. Мен олай боянбаймын», — дейді әнші.
Солай деген Мақпал Жүнісова аталған фильмнен өзі бейнеленген жерді алып тастауды талап ететінін, әйтпесе «Ирина Қайратовнаны» сотқа беретінін айтты.
Бұған дейін «Ирина Қайратовна» Тәуелсіздіктің 30 жылдығына арнап «Отыздан асып барамын» атты фильм түсіргенін хабарлағанбыз.
«Ирина Кайратовна» тобының мүшесі «Отыздан асып барамын» фильмінде басты кейіпкер Азатты сомдаған Алдияр Жапархановқа хабарласқан едік. Бірақ әзілкеш жігіт «Без комментариев» деп қысқа қайырды.
